World Cup 2023 Semi Finals Venue : ఇప్పటివరకు ఎంతో రసవత్తరంగా సాగిన ప్రపంచకప్‌లో కీలక ఘట్టం ప్రారంభం కానుంది. క్వార్టర్స్లో క్యాలిఫై అయిన నాలుగు జట్లు.. సెమీస్ పోరుకు సిద్ధమౌతున్నాయి. ముంబయిలోని వాంఖడే వేదికగా బుధవారం జరగనున్న తొలి సెమీస్‌లో న్యూజిలాండ్‌ -భారత్‌ తలపడనుడగా.. కోల్కతాలోని ఈడెన్ గార్డెన్స్ వేదికగా గురువారం రెండో సెమీస్‌లో దక్షిణాఫ్రికా- ఆస్ట్రేలియా జట్లు రంగంలోకి దిగనున్నాయి. అయితే ఇప్పుడు ఈ రెండు వేదికల గురించి నెట్టింట చర్చ కొనసాగుతోంది. ఈ రెండు పిచ్‌లు ఎవరికి అనుకూలిస్తాయి? అక్కడ పరుగుల వరద పారుతుందా? వికెట్ల హోరు సాగుతుందా? అనే ప్రశ్నలు అభిమానుల్లో మొదలైంది.
వాంఖడే.. ఇక పరుగుల వరదే!
India Vs Newzealand World Cup 2023 : ఇక భారత్‌, న్యూజిలాండ్‌ మధ్య జరగనున్న మ్యాచ్కు వేదికగా నిలవనున్న వాంఖడే స్టేడియంలో పరుగుల వరద పారడం ఖాయమని విశ్లేషకుల మాట. ఎందుకంటే ఇప్పటివరకూ ఈ ప్రపంచకప్‌లో ఈ వేదికపై జరిగిన మ్యాచ్‌ల్లో భారీ స్కోర్లు నమోదయ్యాయి. ఇక్కడ రెండు మ్యాచ్‌లాడిన సౌతాఫ్రికా.. ఇంగ్లాండ్‌పై 399/7, బంగ్లాదేశ్‌పై 382/5 పరుగులు సాధించి రికార్డుకెక్కింది.
మరోవైపు టీమ్ ఇండియా కూడా వాంఖడేలో మంచి స్కోర్ నమోదు చేసింది. శ్రీలంకపై 357/8 స్కోరు సాధించింది. అంతే కాకుండా ఆస్ట్రేలియాపై అఫ్గానిస్థాన్‌ జట్టు 291/5 స్కోరు చేయగా.. ఛేదనలో మ్యాక్స్‌వెల్‌ అద్భుత ద్విశతకంతో కంగారూ జట్టు లక్ష్యాన్ని చేరుకుంది. అయితే బ్యాటింగ్‌కు అనుకూలించే ఈ పిచ్‌పై తొలుత బ్యాటింగ్‌ చేసే జట్టుకు విజయావకాశాలు ఎక్కువ ఉంటాయి. తొలి బ్యాటింగ్‌లో భారీ స్కోరు చేయొచ్చు. ఈ ఎర్రమట్టి పిచ్‌ ఆట సాగుతున్నా కొద్దీ పేసర్లు, స్పిన్నర్లకూ అనుకూలించే అవకాశం ఉంది. దీంతో ఛేదనలో పరిస్థితులు బౌలింగ్‌కు అనువుగా మారే ఆస్కారముంది.