Women World Cup 2022: ఐసీసీ మహిళల వన్డే ప్రపంచకప్లో సెమీస్ చేరేందుకు కీలకమైన మ్యాచ్లో టీమ్ఇండియా అదరగొట్టింది. బ్యాటర్లు స్మృతి మంధాన (71), షెఫాలీ వర్మ (53), కెప్టెన్ మిథాలీ రాజ్ (68) అర్ధశతకాలతో రాణించారు. ఆదివారం దక్షిణాఫ్రికాతో జరుగుతున్న చివరి లీగ్ మ్యాచ్లో 7 వికెట్లు కోల్పోయి 274 పరుగులు చేసింది భారత్. సఫారీ బౌలర్లలో మసబతా క్లాస్ 2, షబ్నిమ్ ఇస్మైల్ 2, క్రియో ట్రయాన్, ఖాక చెరో వికెట్ తీశారు.
ఈ మ్యాచ్లో తొలుత టాస్ గెలిచి బ్యాటింగ్ ఎంచుకుంది టీమ్ఇండియా. ఓపెనర్లు మంధాన, షెఫాలీ వర్మ శుభారంభాన్ని అందించారు. 15వ ఓవర్లలో షెఫాలీ ఔట్ కాగా ఆ తర్వాత క్రీజులోకి వచ్చిన యస్తికా భాటియా (2) కూడా వెంటనే పెవిలియన్ బాటపట్టింది. దీంతో స్కోరు బోర్డు నెమ్మదించింది. ఆ తర్వాత కెప్టెన్ మిథాలీతో కలిసి ఇన్నింగ్స్ను చక్కదిద్దింది మంధాన. ఆఖర్లో హర్మన్ప్రీత్ (48) కూడా మెరిసింది.