ODI World Cup Team India Wicket Keeper: ఆస్ట్రేలియాతో టెస్టు సిరీస్ గెలుపు అనంతరం భారత ఆటగాళ్లు ఐపీఎల్లో వినోదం పంచుతూ బిజీ బిజీగా ఉన్నారు. ఆ తర్వాత ప్రపంచ టెస్ట్ ఛాంపియన్ షిప్ ఫైనల్ ఆడనున్నారు. అనంతరం స్వదేశంలో జరగనున్న వన్డే వరల్డ్ కప్లో పాల్గొనున్నారు. రోహిత్ శర్మ సారథ్యంలో భారత్.. హాట్ ఫెవరెట్గా బరిలో దిగనుంది. టోర్నీ స్వదేశంలో జరగడం భారత్కు కలిసొచ్చే అంశమే. గత మూడు టోర్నీల్లో ఆతిథ్యమిచ్చే జట్లే విజయం సాధించాయి. దీంతో ఈ సారి కూడా అదే సెంటిమెంట్ రిపీట్ అవుతుందో లేదో చూడాలి!
ఇదిలా ఉండగా.. ప్రస్తుతం టీమ్ఇండియాకు బౌలింగ్, వికెట్ కీపింగ్ ప్రధాన సమస్యలుగా మారాయి. బ్యాటింగ్ పరంగా పటిష్ఠంగానే ఉన్నప్పటికీ .. బౌలింగ్ ఇంకా మెరుగుపడాల్సి ఉంది. భారత స్టార్ బౌలర్ జస్ప్రీత్ బుమ్రా ఇప్పుడిప్పుడే వెన్నుముక సర్జరీ నుంచి కోలుకుంటున్నాడు. ఆగస్టు నుంచి అతడు నెట్ ప్రాక్టీస్కు అందుబాటులో ఉంటాడు. ప్రపంచ కప్ సమయానికి బుమ్రా పూర్తిస్థాయి ఫిట్నెస్ సాధిస్తాడని ఆశిస్తున్నామంటూ బోర్డు సెలెక్టర్లు కూడా తెలిపారు.
అయితే టీమ్ఇండియాకు వికెట్ కీపర్ కొరత మాత్రం స్పష్టంగా కనిపిస్తోంది. 2019 వరల్డ్ కప్ తర్వాత ధోనీ రిటైర్మెంట్ ప్రకటించినప్పటి నుంచి భారత్కు మూడు ఫార్మాట్లలో వికెట్ కీపింగ్లో లోటు ఏర్పడింది! నాలుగేళ్లుగా స్థిరమైన కీపర్ లేకపోవడం అభిమానులను కలవరపెడుతోంది. గత కొద్దికాలంగా వికెట్ కీపర్ పాత్రను పోషించిన రిషభ్ పంత్కు గతేడాది డిసెంబరులో ప్రమాదం జరిగింది. తీవ్రంగా గాయపడ్డ రిషబ్.. ఈ వరల్డ్ కప్నకు దూరమయ్యే అవకాశం ఉంది. దీంతో వరల్డ్కప్నకు టీమ్ఇండియాకు వికెట్ కీపర్ ఎవరనేది ప్రశ్నార్థకంగా మారింది.
ఆ స్థానంలో రాహుల్?
అయితే రిషభ్ స్థానాన్ని బీసీసీఐ.. బ్యాటర్ రాహుల్తో భర్తీ చేయబోతుందన్న వార్తలు వినిపిస్తున్నాయి. పంత్ పూర్తి ఫిట్నెస్తో జట్టులో ఉన్న సమయంలో కూడా రాహుల్ చాలా మ్యాచ్ల్లో వికెట్ కీపింగ్ చేశాడు. కెరీర్ పరంగా.. రాహుల్ ఓపెనర్గా, మిడిలార్డర్లో కూడా రాణిస్తాడు. వరుసగా వికెట్లు పడుతున్న సమయంలో కూడా చాలా సార్లు తన క్లాస్ పర్ఫామెన్స్తో ఆకట్టుకున్నాడు రాహుల్. అతడు 18 ఇన్నింగ్స్ల్లో ఐదో స్థానంలో బ్యాటింగ్కు దిగి 53 సగటుతో 742 పరుగులు చేశాడు. ఇందులో ఒక సెంచరీ, ఏడు అర్ధ సెంచరీలు ఉన్నాయి. బెస్ట్ స్టాటిస్టిక్స్తో సెలక్టర్ల దృష్టిలో రాహుల్ ముందు వరుసలో ఉన్నాడు. రానున్న ప్రపంచకప్లో రిషభ్ స్థానంలో రాహుల్ వికెట్కీపింగ్ చేసే అవకాశాలు పుష్కలంగా ఉన్నాయి. మరోవైపు ఇషాన్ కిషన్, సంజూ శాంసన్లు కూడా వికెట్ కీపర్ రేసులో ఉన్నారు.
