టాస్.. ఒక మ్యాచ్‌లో ఏ జట్టు ముందు బ్యాటింగ్‌కు రావాలి.. ఏ జట్టు ఫీల్డింగ్‌కు రావాలో నిర్దేశించేది మాత్రమే. కానీ, ప్రస్తుతం జరుగుతున్న టీ20 వరల్డ్‌ కప్‌లో మాత్రం టాసే కీలకంగా మారింది. ముఖ్యంగా టాస్ గెలిచిన జట్టు ఫీల్డింగ్‌ ఎంచుకోవడం.. దాంతో తొలుత బ్యాటింగ్‌ చేసిన జట్టు ఓటమి చవిచూడడం జరుగుతోంది. సూపర్‌- 12లో భాగంగా జరిగిన చాలా వరకు మ్యాచుల్లో టాస్ గెలుపొందిన జట్లకు టాస్ ఫేవర్‌ చేసిందనడంలో సందేహం అవసరం లేదు.
ఇక భారత్‌ విషయానికొస్తే ఈ టోర్నీలో పాక్‌, న్యూజిలాండ్‌ చేతిలో భారత్‌ ఓటమి చవిచూసింది. ఈ రెండు మ్యాచుల్లోనూ భారత్‌(virat kohli toss record) టాస్ ఓడిపోవడం గమనార్హం. ఈ రెండుసార్లూ భారతే తొలుత బ్యాటింగ్‌ చేసింది. ఫలితం మాట అటుంచితే టీమ్ఇండియా కెప్టెన్‌ విరాట్ కోహ్లీకి(Virat Kohli toss loss) మాత్రం టాస్ ఎప్పుడూ కలిసి రాలేదన్నది జగమెరిగిన సత్యం. బుధవారం జరిగిన అఫ్గాన్‌తో మ్యాచ్‌లో కూడా కోహ్లీ టాస్ ఓడిపోవడం వల్ల టాస్‌పై సోషల్‌మీడియాలో మరోసారి చర్చ జరుగుతోంది. 'విరాట్ భయ్యా.. టాస్ ఎప్పుడు గెలుస్తావు?' అంటూ నెెటిజన్లు ఫన్నీ ట్రోల్స్ చేస్తున్నారు.
గాల్లోకి ఎగిరే కాయిన్‌ కారణంగా కోహ్లీని ఇక్కడ నిందించాల్సిన అవసరం లేదు. అయితే, టాస్ గెలిచే విషయంలో 50/50 అవకాశాలుంటాయన్నది విశ్లేషకుల మాట. ఈ విషయంలో విరాట్ కొంచెం వెనుకంజలో ఉన్నాడనే చెప్పాలి. టీ20 వరల్డ్‌ కప్‌లో భాగంగా మూడు మ్యాచుల్లోనూ విరాట్ టాస్ ఓడిపోవడమే ఇందుకు ఉదాహరణ.