టీమ్ ఇండియా స్టార్ పేసర్ ఉమేశ్ యాదవ్ తండ్రిగా ప్రమోషన్ పొందాడు. మార్చి 8న తాము తల్లిదండ్రులయ్యామంటూ ట్విట్టర్ వేదికగా ఆనందన్ని వ్యక్తం చేశాడు ఉమేశ్. మహిళా దినోత్సవం రోజు తనకు పండంటి ఆడపిల్ల పుట్టిందంటూ సోషల్ మీడియాలో అభిమానులతో తన సంతోషాన్ని పంచుకున్నాడు. దీంతో ఉమేశ్ యాదవ్ అభిమానులు సంబరాలు చేసుకుంటున్నారు. ఈ శుభ వార్తతో క్రికెట‌ర్ల‌తో పాటు అభిమానులు ఈ ఉమేశ్, తన్యకు శుభాకాంక్ష‌లు తెలియజేశారు. చిన్నారికి ఆశీర్వదించారు. ప్ర‌స్తుతం ఆస్ట్రేలియాతో జరుగుతున్న బోర్డర్-గ‌వాస్క‌ర్ సిరీస్‌ ఆడుతున్నాడు ఉమేశ్ యాదవ్.
ఫిబ్రవరిలో ఉమేశ్ యాదవ్ తండ్రి తిలక్ యాదవ్ అనారోగ్యంతో కన్నుమూశారు. ఇక, బిడ్డ పుట్టడం వల్ల ఆ బాధలో ఈ పేసర్కు కాస్త ఉపశమనం కలిగినట్లైంది. అయితే ఈ దంపతులిద్దరికీ 2021లో పాప పుట్టింది. ఇప్పుడు మరో మహిళా దినోత్సవం రోజు ఆడపిల్ల పుట్టడం వల్ల ఉమేశ్ సంతోషాకి అవధులు లేకుండా పోయాయి. ఐపీఎల్ వేడుక‌లో తన్య‌ను చూసిన ఉమేష్.. తొలి చూపులోనే ఆమెతో ప్రేమ‌లో ప‌డ్డాడు. కామ‌న్ ఫ్రెండ్స్ ద్వారా వారిద్దరి మధ్య పరిచయం ఏర్పడింది. ఆ పరిచయం కాస్త ప్రేమ‌గా మారి.. పెద్ద‌ల అంగీకారంతో 2013లో వివాహ బంధంతో ఒక్కటయ్యారు. బోర్డర్-గావస్కర్ ట్రోఫీలో బిజీగా ఉన్న ఉమేస్.. ఈ చివరి మ్యాచ్ ముగిసిన తర్వాత కుమార్తెను చూసేందుకు వెళ్లే అవకాశం ఉంది.
కాగా, మూడో టెస్ట్‌లో ఆడే అవ‌కాశాన్ని ద‌క్కించుకున్న ఉమేశ్.. ఆ మ్యాచ్లో మూడు వికెట్లు తీసి స‌త్తా చాటాడు. స్పిన్‌కు అనుకూలించిన పిచ్‌పై పేస్ బౌలింగ్‌తో ఆస్ట్రేలియా ఆట‌గాళ్ల‌కు చుక్కలు చూపించాడు. అలా నాలుగో టెస్ట్‌లో తన స్థానాన్ని దాదాపు ప‌దిలం చేసుకున్నాడు. ఐసీసీ ప్రపంచ టెస్టు ఛాంపియన్‌షిప్ ఫైనల్‌కు టీమ్ఇండియా చేరాలంటే.. ఈ నాలుగో టెస్టులో తప్పక గెలవాల్సి ఉంది. దీంతో కాస్త ఫాస్ట్బౌలింగ్కు అనుకూలించే పిచ్‌పై.. నాలుగో టెస్టుని నిర్వహించబోతున్నట్లు వార్తలు వస్తున్నాయి. ఈ నేపథ్యంలో వేగంగా బంతులు విసరగలిగే ఉమేశ్ యాదవ్ జట్టుకు కీలకం అవుతాడు.
మరోవైపు, భారత్-ఆస్ట్రేలియా మధ్య అహ్మదాబాద్ వేదికగా జరుగనున్నఈ ప్రతిష్టాత్మక మ్యాచ్కు భారత ప్రధాని నరేంద్ర మోదీ, ఆస్ట్రేలియా ప్రధాని అంథోనీ అల్బనీస్ హాజరు కానున్నారు. నాలుగో టెస్ట్ తొలిరోజు ఆటను కలిసి వీక్షించనున్నారు. ఇందుకోసం మొతేరాలో ఉన్న నరేంద్ర మోదీ స్టేడియంలో భారీ ఏర్పాట్లు చేస్తున్నారు. ఈ టెస్ట్ మ్యాచ్ తొలిరోజు లక్ష మంది వరకు ప్రేక్షకులు వస్తారని అంచనా. దీంతో ఎక్కువ మంది వీక్షకులు వచ్చిన స్టేడియంగా రికార్డు బద్దలుగొట్టనుంది. కాగా, ఇరుదేశాల ప్రధానులు హాజరుకానున్న వేళ.. 3 వేల మంది పోలీసులతో భద్రతా ఏర్పాట్లు చేస్తున్నారు. వీరికి అదనంగా కేంద్రబలగాలు కూడా భద్రతా ఏర్పాట్లలో నిమగ్నమయ్యాయి.
