U19 WC: వెస్టిండీస్ వేదికగా జరుగుతున్న అండర్-19 ప్రపంచకప్లో పాల్గొన్న టీమ్ఇండియా జట్టులో కరోనా కలవరం రేకెత్తించింది. జట్టులో ఏకంగా ఆరుగురు ప్లేయర్లు మహమ్మారి బారినపడటం వల్ల వారిని ఐసోలేషన్లో ఉంచారు. ఈ నేపథ్యంలో వీరి స్థానంలో ఐదుగురు రిజర్వ్ ప్లేయర్లను విండీస్కు పంపేందుకు సిద్ధమైంది బీసీసీఐ. కీలకమైన క్వార్టర్స్ మ్యాచ్ సమయానికి వీరంతా క్వారంటైన్ పూర్తి చేసుకుని జట్టుతో కలుస్తారని వెల్లడించారు అధికారులు.
రిజర్వ్ ఆటగాళ్లు వీరే- ఉదయ్ సహరన్, అభిషేక్ పోరెల్ (వికెట్ కీపర్), రిషిత్ రెడ్డి, అన్ష్ గోసాయ్, పీఎం సింగ్ రాథోడ్.
వీరంతా విండీస్ చేరగానే ఆరు రోజుల పాటు క్వారంటైన్లో ఉండనున్నారు. ఇప్పటికే వరుసగా దక్షిణాఫ్రికా, ఐర్లాండ్తో జరిగిన రెండు మ్యాచ్ల్లో గెలిచిన భారత జట్టు గ్రూప్-బి టేబుల్ టాపర్గా కొనసాగుతోంది. దీంతో జనవరి 29న జరగబోయే క్వార్టర్ ఫైనల్ మ్యాచ్ వరకు.. జట్టు పూర్తి ఫిట్నెస్తో ఉంటుందని బీసీసీఐ ఆశాభావం వ్యక్తం చేస్తోంది.
ఐర్లాండ్తో జరిగిన మ్యాచ్కు ముందు టీమ్ఇండియా నుంచి నలుగురు ఆటగాళ్లు కరోనా బారినపడినట్లు తెలిపింది బోర్డు. కెప్టెన్ యశ్ ధుల్, వైస్ కెప్టెన్ ఎస్కే రషీద్తో పాటు మరో ఇద్దరికి వైరస్ సోకినట్లు వెల్లడించింది. వీరితో పాటు మరో ఇద్దరికి లక్షణాలు కనిపించడం వల్ల వారికి టెస్టులు నిర్వహించి ఐసోలేషన్నకు పంపినట్లు అధికారులు పేర్కొన్నారు. ఇలా కీలక ఆటగాళ్లు మ్యాచ్కు దూరమైనా.. నిషాంత్ సింధు నేతృత్వంలోని యువ భారత జట్టు.. ఐర్లాండ్ను 174 పరుగుల తేడాతో చిత్తుచేసింది. శనివారం గ్రూప్ దశలోని తన ఆఖరి మ్యాచ్లో ఉగాండాతో తలపడనుంది టీమ్ఇండియా.
