బీసీసీఐ ఫ్యూచర్ ప్లాన్- 33మంది ప్లేయర్లతో టీమ్ఇండియా- ఏ టోర్నీకైనా రెడీ!

Team India Future Plan : టీమ్ఇండియా రానున్న రోజుల్లో పలు కీలకమైన టోర్నమెంట్​లు, ద్వైపాక్షిక సిరీస్​లు ఆడాల్సి ఉంది. ఈ నేపథ్యంలో జట్టు సెలెక్షన్ కమిటీ, ఎన్​సీఏ వ్యవహరించనున్న తీరును ఈటీవీ భారత్​తో షేర్ చేసుకున్నారు బీసీసీఐ అధికారి ఒకరు. ఆసక్తికరమైన విషయాలు తెలిపారు.

Team India Future Plan :టీమ్ఇండియా కెప్టెన్ రోహిత్ శర్మ, స్టార్ బ్యాటర్ విరాట్ కోహ్లీ, కేఎల్ రాహుల్ ఇటీవల ముగిసిన వన్డే వరల్డ్​కప్​లో అద్భుత ప్రదర్శన కనబర్చారు. టోర్నీలో వరుసగా 10 మ్యాచ్​ల్లో గెలిచి ఫైనల్ చేరినా తుదిపోరులో ఆస్ట్రేలియా చేతిలో ఓడి రన్నరప్​గా నిలిచిన విషయం తెలిసిందే. మెగా టోర్నీలో ఛాంపియన్​గా నిలువకపోయినా వైట్ బాల్ (లిమిటెడ్ ఓవర్లు) క్రికెట్​లో టీమ్ఇండియా అత్యుత్తమ జట్టని విశ్లేషకులు అభిప్రాయపడుతున్నారు.

మరి జట్టు ఇంత బలంగా అవ్వడానికి కారణమెవరు? ఇదంతా ఒక్క రోజులో జరిగిందా? అయితే టీమ్ఇండియా అత్యుత్తమ జట్టుగా మారడానికి బీసీసీఐ, బెంగళూరులోని నేషనల్ క్రికెట్ అకాడమీ (ఎన్​సీఏ) ఎంతగానో తోడ్పడ్డాయి అనడంలో ఎలాంటి సందేహం లేదని సెలెక్షన్ కమిటీ పేర్కొంది. ఈ క్రమంలో జట్టుకు బలమైన పునాది వేయడంలో మున్ముందు కూడా ఎన్​సీఏ పాత్ర కీలకం కానుంది.

అయితే ప్రస్తుతం బోర్డు, రాబోయే రోజుల్లో టీమ్ఇండియా ఆడనున్న టోర్నీలు, ద్వైపాక్షిక సిరీస్​లపై దృష్టి సారించింది. భవిష్యత్​లో భారత్ ఆడనున్న క్రికెట్​ జట్టు ఎంపికకై ఐదుగురు సెలెక్షన్​ అధికారులు, ఎన్​సీఏతో చర్చించనున్నారు. ఈ ఎంపికపై బీసీసీఐ అధికారి ఒకరు ఈటీవీ భారత్​తో మాట్లాడారు.

"ప్రస్తుతం 30- 33 మంది ఆటగాళ్లతో ఓ బెంచ్​ తయారు చేస్తున్నాం. ఇందులో సీనియర్లు, భారత్- ఏ ఆటగాళ్లు, మిగతా ప్లేయర్లు ఉంటారు. వారు ఏ టోర్నీకైనా, ద్వైపాక్షిక సిరీస్​కైనా ఎంపికైతే ఆడేందుకు సిద్ధంగా ఉంటారు. సెలెక్షన్​ కమిటీ మెంబర్స్​, ఎన్​సీఏ అధికారులు కలిసి ఈ బృందాన్ని ఎంపిక చేస్తారు. ఇందులో పూర్తిగా ఫిట్​గా ఉండి, మూడు ఫార్మాట్​లు ఆడే ప్లేయర్లే ఎంపికవుతారు" అని బీసీసీఐ అధికారి ఒకరు అన్నారు.

స్ట్రాంగ్ బెంచ్..ఇతర జట్లతో పోలిస్తే.. టీమ్ఇండియా బెంచ్ నాణ్యమైన ఆటగాళ్లతో స్ట్రాంగ్​గా ఉంది. యశస్వి జైశ్వాల్, రుతురాజ్ గైక్వాడ్, తిలక్ వర్మ, ప్రసిద్ధ్ కృష్ణ, అర్షదీప్ సింగ్, ముకేశ్ కుమార్, అభిమన్యూ ఈశ్వరణ్ జట్టుకు అవసరమైనప్పుడు రంగంలోకి దిగేందుకు సిద్ధంగా ఉన్నారు. ఇక జస్ప్రీత్ బుమ్రా, మహ్మద్ షమీ, మహ్మద్ సిరాజ్ ప్రపంచంలో మేటి బ్యాటర్లను కలవరపెడుతుండగా, ప్రసిద్ధ్, అర్షదీప్, నవ్​దీప్ సైనీ, ముకేశ్ కుమార్ ఛాన్స్ వచ్చినప్పుడు సత్తా చాటేందుకు రెడీగా ఉన్నారు.