T20 World Cup India Team : టీ20 ప్రపంచకప్‌కు ఇంకో నెల రోజులే సమయం ఉంది. ఈ మెగా టోర్నీలో తలపడే దేశాలన్నీ జట్లను ప్రకటించేశాయి. టీమ్‌ఇండియా కూడా కొన్ని రోజుల కిందటే జట్టును వెల్లడించింది. అయితే జట్టు కూర్పు, ఆటగాళ్ల ఫామ్‌పై సందేహాలు తొలగిపోలేదు. గత ఏడాది ప్రపంచకప్‌లో చేదు అనుభవం తర్వాత ప్రణాళిక బద్ధంగానే అడుగులేసినప్పటికీ.. ఈ ఏడాది కప్పు ముంగిట కొంత గందరగోళం, ఆందోళన తప్పట్లేదు. ఈ నేపథ్యంలో ఆస్ట్రేలియా, దక్షిణాఫ్రికా జట్లతో కలిపి ఆడబోయే ఆరు టీ20ల్లో పరిష్కరించుకోవాల్సిన సమస్యలు ఆరు ఉన్నాయి. అవేంటంటే..
టాప్‌.. గాడిన పడాలి :కొంత కాలంగా టీమ్‌ఇండియాకు టాప్‌ ఆర్డర్‌ నిలకడ లేమి సమస్యగా మారింది. రోహిత్‌, రాహుల్‌, కోహ్లి ముగ్గురూ సమష్టిగా సత్తా చాటి చాలా కాలం అయింది. ఇటీవల ఆసియా కప్లో కోహ్లి ఫామ్‌ అందుకున్నప్పటికీ.. మిగతా ఇద్దరూ తడబాటు కొనసాగించారు. టాప్‌ ఆర్డర్‌ శుభారంభాలు అందించకపోవడం, జట్టుకు బలమైన పునాది వేయకపోవడం వల్ల మిడిల్‌పై ఒత్తిడి పెరుగుతోంది. ప్రపంచకప్ ముంగిట రోహిత్‌, రాహుల్‌ నిలకడ అందుకోవడం, కోహ్లి జోరు కొనసాగించడం.. మొత్తంగా టాప్‌ఆర్డర్‌ జట్టుకు భరోసానివ్వడం చాలా అవసరం.
ఆ స్థానాన్ని భర్తీ చేసేదెవరు?:టీ20 ప్రపంచకప్ ముంగిట ఆల్‌రౌండర్‌ రవీంద్ర జడేజా గాయంతో జట్టుకు దూరం కావడం భారత్‌కు పెద్ద దెబ్బే. ఇటీవల అతను చక్కగా బ్యాటింగ్‌ చేస్తున్నాడు. జడేజా జట్టులో ఉండడంతో అదనంగా ఒక బ్యాట్స్‌మన్‌ లేదా బౌలర్‌ను ఎంచుకునే సౌలభ్యం ఉండేది. అతడి స్థానాన్ని భర్తీ చేయడం ఇబ్బందిగా మారింది. అక్షర్‌ పటేల్‌ బ్యాటింగ్‌, బౌలింగ్‌ రెండింట్లోనూ జడేజాకు సరితూగలేడు. దీపక్‌ హుడాను ఆడిద్దామంటే అతణ్ని నమ్మి బంతి ఇవ్వడం కష్టమే. మరి రాబోయే మ్యాచ్‌ల్లో జడేజా స్థానాన్ని ఎవరితో భర్తీ చేస్తారో చూడాలి.
ఏది సరైన లెక్క?:టీ20 ప్రపంచకప్‌కు భారత జట్టు స్పెషలిస్టు పేసర్లు నలుగురినే ఎంచుకోవడాన్ని ఆస్ట్రేలియా మాజీ ఫాస్ట్‌బౌలర్‌ మిచెల్‌ జాన్సన్‌ తప్పుబట్టాడు. పేస్‌కు అనుకూలించే పరిస్థితుల్లో అదనంగా మరో పేసర్‌ను తీసుకోవాల్సిందన్నది అతడి ఉద్దేశం. కానీ పేస్‌ కంటే స్పిన్‌నే ఎక్కువగా నమ్ముకునే భారత్.. చాన్నాళ్ల నుంచి తుది జట్టులో ఇద్దరు పేసర్లకు తోడు ఇద్దరు స్పిన్నర్లను ఆడిస్తోంది. హార్దిక్‌ పాండ్య రూపంలో పేస్‌ ఆల్‌రౌండర్‌ ఉండడంతో మరో పేసర్‌ అవసరం లేదని భావిస్తోంది. ఆస్ట్రేలియాలోనూ అదే కూర్పును అనుసరిస్తే కష్టమన్నది జాన్సన్‌ లాంటి వాళ్ల వాదన. మరి ఆస్ట్రేలియా, దక్షిణాఫ్రికాలను సొంతగడ్డపై ఢీకొనబోతున్న భారత్.. ఇక్కడి పిచ్‌లకు అనుగుణంగా బౌలింగ్‌లో పాత కూర్పును అనుసరిస్తుందా.. లేక ఆస్ట్రేలియా పిచ్‌లను అనుసరించి ఒక స్పిన్నర్‌ను తగ్గించి ఇంకో పేసర్‌ను ఆడిస్తుందా అన్నది ఆసక్తికరం.