టీ20 ప్రపంచకప్లో ప్రత్యర్థులతో పోటీ పడేందుకు టీమ్ఇండియా సిద్ధమవుతున్న వేళ.. భారత ఆల్రౌండర్ హార్దిక్ పాండ్యా కీలక విషయాలు వెల్లడించాడు. ఫినిషర్గా తన కెరీర్లో టీ20 ప్రపంచ కప్(Hardik Pandya In T20 World Cup) అత్యంత పెద్ద బాధ్యత అని తెలిపాడు. మహేంద్ర సింగ్ ధోనీ ప్రస్తుతం జట్టులో లేకపోవడం వల్ల ఇప్పుడు పూర్తి భారం తనపైనే ఉందని పేర్కొన్నాడు.
"ఇప్పటివరకు నాపై ఉన్న అత్యంత పెద్ద బాధ్యత ఇదే అని చెప్పగలను. ఎందుకంటే.. ఈసారి మహేంద్ర సింగ్ ధోనీ లేడు. భారమంతా నాపైనే ఉందని నేను అనుకుంటున్నా. అలా అనుకోవడం వల్ల అది నాకు ఛాలెంజింగ్గా ఉంటుంది. టోర్నీలో పాల్గొనడం ఆనందంగా ఉంది."
- హార్దిక్, టీమ్ ఇండియా ఆల్రౌండర్
"నన్ను మొదటి నుంచి అర్థం చేసుకున్న వ్యక్తి ధోనీనే. నేను ఎలా ఆడతాను. నేను ఎలాంటి వ్యక్తి. నాకు ఏవి నచ్చవు.. వంటి విషయాలన్నీ ధోనీకి తెలుసు"అని హార్దిక్ పేర్కొన్నాడు. 2019లో న్యూజిలాండ్ పర్యటనలో టీవీ వివాదంలో చిక్కుకున్నప్పుడు తనకు ధోనీ ఎంతో సాయం చేశాడని గుర్తు చేసుకున్నాడు.
"న్యూజిలాండ్లో నాకు హోటల్ గదులు లేవు. కానీ, అప్పుడు ధోనీ నుంచి కాల్ వచ్చింది. నువ్వు నా దగ్గరకు వచ్చేయ్. 'నేను బెడ్ మీద పడుకోను. నువ్వు నా బెడ్ మీద పడుకో. నేను కింద పడుకుంటా' అని చెప్పాడు. నాకు ఏదైనా అయితే.. ఎప్పడూ ముందుండే వ్యక్తి అతడు. నా గురించి అన్ని విషయాలు అతడికి తెలుసు. ధోనీకి నేను చాలా సన్నిహితుడిని. నన్ను ప్రశాంతంగా ఉంచే ఏకైక వ్యక్తి ధోనీ."
-హార్దిక్ పాండ్యా, టీమ్ ఇండియా ఆల్రౌండర్
తన క్రికెట్ కెరీర్లో ఎన్నోసార్లు ధోనీ తనను ఆదుకున్నాడని చెప్పాడు హార్దిక్. "ఎంఎస్ ధోనీని గొప్పవాడిగా నేనెప్పుడూ చూడలేదు. నాకైతే అతడు సోదరుడు. జీవిత మార్గదర్శి. ధోనీతో గడిపితే.. ఎవరైనా సరే పరిణితి చెందుతారు. వినయంగా మాట్లాడటం నేర్చుకుంటారు" అని హార్దిక్ చెప్పాడు.
2019లో సర్జరీ అనంతరం హార్దిక్ పాండ్యా.. ఐపీఎల్లోగాని, భారత జట్టులో కానీ రెగ్యులర్గా బౌలింగ్తో అదరగొట్టిన సందర్భాలు చాలా తక్కువ. ఈ ఐపీఎల్ సీజన్లోనూ ఫిట్నెస్ సమస్యల కారణంగా అతడు పలు మ్యాచ్లకు దూరమయ్యాడు.
ఇవీ చూడండి:
