Natarajan Cricket Ground: టీమ్ఇండియా యువ పేసర్ నటరాజన్ జాతీయ జట్టులో అరంగేట్రం చేసి ఏడాది పూర్తి కావొస్తోంది. 2020-21లో భారత జట్టు ఆస్ట్రేలియా పర్యటనలో భాగంగా తొలి మ్యాచ్ ఆడిన నటరాజన్.. తర్వాత జట్టు తరఫున అన్ని ఫార్మాట్లలో ఆడాడు. ఈ సందర్భంగా సొంతూల్లో క్రికెట్ మైదానం ఏర్పాటు చేయాలనే కలను నిజం చేయబోతున్నట్లు చెప్పుకొచ్చాడు నటరాజన్. దీనికి సంబంధించి ఓ తాజాగా ఓ ట్వీట్ చేశాడు.
భారత్ తరఫున అన్ని ఫార్మాట్లు ఆడటంపై హర్షం వ్యక్తం చేసిన నటరాజన్.. తన సొంతూల్లో ఏర్పాటు చేసిన మైదానం పేరు 'నటరాజన్ క్రికెట్ గ్రౌండ్' అని తెలిపాడు.
"సొంత ఊరిలో అన్ని సౌకర్యాలు ఉండేలా క్రికెట్ మైదానం ఏర్పాటు చేయడం సంతోషంగా ఉంది. ఈ మైదానానికి నటరాజన్ క్రికెట్ గ్రౌండ్(ఎన్సీజీ) అని పేరు పెడతాం. గతేడాది డిసెంబర్లో భారత జట్టు తరఫున అరంగేట్రం చేశా. ఈ ఏడాది డిసెంబర్లో మైదానం కడుతున్నా." అని ట్విట్టర్ పోస్ట్లో తెలిపాడు యువ పేసర్ నటరాజన్. కలలు తప్పకుండా నిజమవుతాయని తెలిపాడు. క్రికెట్ మైదానం ఫొటోలను షేర్ చేశాడు.
ఐపీఎల్లో సన్రైజర్స్ తరఫున ఆడిన నటరాజన్ అనేకసార్లు కీలక వికెట్లు పడగొట్టి జట్టు విజయంలో ముఖ్యపాత్ర పోషించాడు. ఎస్ఆర్హెచ్ కెప్టెన్ కేన్ విలియమ్సన్ కూడా నటరాజన్పై ప్రశంసలు కురిపించాడు.