Suryakumar Yadav News: భారత జట్టు కోసం అవసరమైతే బౌలింగ్ చేయడానికి కూడా తాను సిద్ధంగా ఉన్నట్లు సూర్యకుమార్ యాదవ్ తెలిపాడు. వెస్టిండీస్‌తో బుధవారం జరిగిన తొలి టీ20 మ్యాచ్‌లో సూర్యకుమార్ (34) నాటౌట్‌గా నిలిచిన విషయం తెలిసిందే. టీమిండియా తరఫున ఫినిషర్‌ పాత్ర పోషించడాన్ని ఆస్వాదిస్తున్నానని అతడు పేర్కొన్నాడు.
"జట్టు కోసం అవసరమైతే బౌలింగ్ చేసేందుకు కూడా నేను సిద్ధంగా ఉన్నాను. బౌలర్లు నెట్స్‌లో బ్యాటింగ్ సాధన చేస్తున్పప్పుడు వారికి బౌలింగ్ చేస్తూ మెలకువలు నేర్చుకుంటున్నాను. దాంతో పాటు మిడిలార్డర్‌లో బ్యాటింగ్‌కు దిగి ఆఖరి వరకు క్రీజులో ఉండటం చాలా ముఖ్యమని నేను భావిస్తాను.
జట్టు విజయానికి మరో 20-25 పరుగుల దూరంలో ఉన్నప్పుడు ఔటైతే చాలా బాధగా ఉంటుంది. బ్యాటింగ్ చేస్తున్నప్పుడు వెంకటేశ్ అయ్యర్‌ పూర్తి సానుకూల దృక్పథంతో ఆడతాడు. అతడి నుంచి చక్కటి మద్దతు లభించింది. మేమిద్దరం ఆఖరి వరకు క్రీజులో ఉండి జట్టుని గెలిపించాలనుకున్నాం" అని సూర్యకుమార్ యాదవ్ చెప్పాడు.
ఈ మ్యాచులో వెంకటేశ్ అయ్యర్‌ (24) పరుగులతో నాటౌట్‌గా నిలిచిన విషయం తెలిసిందే. వీరిద్దరూ కలిసి 26 బంతుల్లో 48 పరుగుల భాగస్వామ్యం నెలకొల్పి టీమిండియాను గెలిపించారు.