శ్రీలంక, న్యూజిలాండ్ లాంటి జట్లపై అలవోక విజయాలను అందుకున్న టీమ్ ఇండియా. ఇప్పుడు ఆస్ట్రేలియాతో సుదీర్ఘ సిరీస్ ఆడేందుకు సిద్ధమౌతోంది. భారత్తో నాలుగు టెస్టులతో పాటు మూడు వన్డేలు ఆడేందుకు ఆస్ట్రేలియా జట్టు ఇండియాలో ఎప్పుడో ల్యాండ్ అయ్యింది. బెంగళూరు వేదికగా టెస్టు సిరీస్ కోసం ఇరు జట్లు తీవ్రంగా శ్రమిస్తోంది. ఈ క్రమంలో ఈ సిరిస్ గురించి మాజీ ప్లేయర్ సునీల్ గావస్కర్ పలు వ్యాఖ్యలు చేశారు. అవేంటంటే..
తిరుగులేని ఫామ్‌లో ఉన్న శుభ్‌మన్‌ గిల్‌ ఆస్ట్రేలియాతో తొలి టెస్టులో తుది జట్టుకు ఎంపిక కావడం మామూలుగా జరిగిపోవాలి. కానీ రోహిత్‌ శర్మ, కేఎల్‌ రాహుల్‌ల రూపంలో ముందు నుంచి ఆడుతున్న ఓపెనర్లుండగా గిల్‌ను ఎక్కడ ఆడించాలన్నది ప్రశ్న. రాహుల్‌ కొంత విరామం తర్వాత వస్తున్నాడు కాబట్టి అతనే బ్యాటింగ్‌ ఆర్డర్లో దిగువన ఆడొచ్చు.
శ్రేయస్‌ ఫిట్‌గా ఉంటే రాహుల్‌ వికెట్‌ కీపింగ్‌ కూడా చేస్తూ దిగువన బ్యాటింగ్‌ చేస్తే మిడిలార్డర్‌ బలోపేతం అవుతుంది. భారత జట్టు తరఫున అరంగేట్రం కోసం దీర్ఘ కాలంగా ఓపికతో వేచి చూస్తున్న కేఎస్‌ భరత్‌కు ఇంకా అవకాశం ఇవ్వకపోవడం కఠినమైన నిర్ణయమే. కానీ కొన్నిసార్లు జట్టు సమీకరణాల వల్ల ఇలాంటి నిర్ణయాలు తప్పవు. అయ్యర్‌ ఫిట్‌గా లేకుంటే భరత్‌కు తుది జట్టులో చోటిచ్చే వీలుంటుంది. బంగ్లాదేశ్‌లో అశ్విన్‌తో కలిసి అయ్యర్‌ చూపిన పట్టుదల ప్రశంసనీయం. ఆస్ట్రేలియాపైనా మన వాళ్లు ఇలాంటి పట్టుదలే చూపాలి.