Asia Cup 2023 Hybrid Model : ఆసియా కప్-2023 నిర్వహణకు సంబంధించి పాకిస్థాన్ క్రికెట్ బోర్డు మాజీ చీఫ్ నజామ్ సేథీ ప్రతిపాదించిన 'హైబ్రిడ్ మోడల్' తనకు నచ్చలేదంటూ పీసీబీ కొత్త చైర్మన్ జకా ఆష్రాఫ్ చేసిన కీలక వ్యఖ్యలు తీవ్ర దుమారం రేపాయి. ఏసీసీ ఆమోదం తెలిపిన హైబ్రిడ్ మోడల్ వల్ల పాకిస్థాన్కు నష్టం జరుగుతుందని.. తనకీ విధానం ఏమాత్రం నచ్చలేదని ఆష్రాఫ్ సంచలన వ్యాఖ్యలు చేశారు. దీంతో మళ్లీ ఆసియా కప్ జరుగుతుందా? లేదా? అనే సందిగ్ధత మళ్లీ నెలకొన్న నేపథ్యంలో ఈ మోడల్ తిరస్కరణపై ఆయన స్పష్టతనిచ్చారు. తాను వేరే దురుద్దేశంతో ఆ వ్యాఖ్యలు చేయలేదంటూ వివరణను ఇచ్చుకున్నారు.
"హైబ్రిడ్ మోడల్పై తాజాగా నేను చేసిన వ్యాఖ్యలు నా వ్యక్తిగత అభిప్రాయం మాత్రమే. అయితే ఈ హైబ్రిడ్ మోడల్ వల్ల పాకిస్థాన్కు వచ్చే లాభం ఏమి లేదు. ఈ టోర్నమెంట్లో ఎక్కువ శాతం మ్యాచులు శ్రీలంకలో, పాక్లో కేవలం నాలుగు మ్యాచులే జరపడం నాకు నచ్చలేదు. దీనివల్ల మాకు ఉపయోగం ఏమీ ఉండదు. ఆతిథ్యం ఇవ్వాల్సిన దేశం కాబట్టి.. పాక్ ఇంకొంత బలంగా చర్చించి, టోర్నీ అంతా పాక్‌లోనే జరిగేలా చర్యలు తీసుకుంటే బాగుండేది."
- పీసీబీ నూతన చైర్మన్ జకా ఆష్రాఫ్
Asia Cup 2023 : కొత్తగా పీసీబీ చైర్మన్ బాధ్యతలు చేపట్టిన జకా ఆష్రాఫ్ వెంటనే ఏసీసీ అంగీకరించిన హైబ్రిడ్ మోడల్‌ను వెనక్కు తీసుకుంటారని.. అవసరమైతే ఈ టోర్నీ నుంచి పాకిస్థాన్ తప్పుకునేలా చర్యలు తీసుకుంటారని వార్తలు వచ్చాయి. ఈ నేపథ్యంలో తన వ్యాఖ్యలపై తప్పుడు ప్రచారం జరుగుతోందని భావించిన ఆష్రాఫ్ ఈ మేరకు స్పందించారు. 'ఇప్పటికే ఈ ఒప్పందంపై ఓ నిర్ణయం తీసుకున్నారు. కాబట్టి ఇప్పుడు దాని ప్రకారం నడుచుకోవడం తప్ప నేనేమీ చేసేదేమి లేదు. ఈ నిర్ణయాన్ని వెనక్కు తీసుకోవాలని కానీ దాన్ని తిరస్కరిచాలనే ఉద్దేశం కానీ తనకు అస్సలు లేదంటూ' చెప్పారు. మొత్తంగా ఆసియా కప్ను అడ్డుకునే దురుద్దేశం మాత్రం తనకు ఏ మాత్రం లేదని స్పష్టం చేశారు. అయితే.. ఇకపై పీసీబీ పరిధిలో తీసుకునే ప్రతి నిర్ణయంపై ఆచితూచి వ్యవహరిస్తామని.. తీసుకునే ప్రతి నిర్ణయంలో దేశ హితం ఇమిడి ఉంటుందని ఆష్రాఫ్ తెలిపారు. కాగా, ఆగస్ట్‌ 31 నుంచి సెప్టెంబర్ 17 వరకు ఆసియా కప్ జరగాల్సి ఉంది.
అసలేంటీ హైబ్రిడ్ మోడల్..
Hybrid Model Of Asia Cup : ప్రతీష్ఠాత్మక ఆసియా కప్ సిరీస్ ఆసియా ఖండంలోని ఆరు దేశాలైన భారత్, పాకిస్థాన్, శ్రీలంక, బంగ్లాదేశ్, అఫ్గానిస్థాన్, నేపాల్ క్రికెట్ జట్ల మధ్య జరుగుతాయి. కాగా, వన్డే ఫార్మాట్‌లో జరిగే ఈ టోర్నీ ఈసారి దాయాది పాకిస్థాన్ గడ్డపై జరగాల్సి ఉంది. అయితే తమ జట్టుకు సంబంధించి భద్రతా కారణాల దృష్ట్యా ఇండియన్ టీమ్ను పాక్‌కు పంపే ప్రసక్తే లైదని భారత క్రికెట్ బోర్డు బీసీసీఐ తేల్చిచెప్పింది. ఈ క్రమంలోనే దీనికి ప్రత్యామ్నాయంగా హైబ్రిడ్ మోడల్‌ను పాకిస్థాన్ క్రికెట్ బోర్డు మాజీ చైర్మన్ నజాం సేథీ ప్రతిపాదించారు. ఈ ఒప్పందం ప్రకారం ఆసియా కప్ 2023ను పాకిస్థాన్, శ్రీలంకలో నిర్వహించేందుకు తాజాగా ఆసియా క్రికెట్ కౌన్సిల్ (ఏసీసీ) కూడా అంగీకారం తెలిపింది. దీని ప్రకారం ఇరు దేశాలు ఈ టోర్నీకి ఆతిథ్యం ఇవ్వనున్నాయి. అయితే ఈ హైబ్రిడ్ విధానంను మొదట్లో బంగ్లాదేశ్, శ్రీలంకలు ఒప్పుకోలేదు. ఇక అనేక చర్చల అనంతరం ఆసియా కప్ను నిర్వహించేందుకు శ్రీలంక సుముఖత చూపింది.
