సూపర్ ఓవర్​లో స్పిన్నర్ల మ్యాజిక్- పేసర్ల కంటే వీళ్లే డెంజర్

Spinners In Super Over: క్రికెట్​లో సూపర్​ ఓవర్లలో అత్యధికసార్లు పేసర్లే యాక్షన్​లోకి దిగుతారు. జట్టు కెప్టెన్​ కూడా స్పిన్నర్​కు బౌలింగ్ ఇవ్వడానికి అంతగా ఇష్టపడరు. కానీ, బుధవారం నాటి మ్యాచ్​లో స్పిన్నర్ రవి బిష్ణోయ్ అద్భుత బౌలింగ్​తో టీమ్ఇండియాను గెలిపించాడు. ఈ క్రమంలో గతంలో స్పిన్నర్లు గెలిపించిన సూపర్​ ఓవర్​ మ్యాచ్​లేవో తెలుసుకుందాం.

Spinners In Super Over:భారత్- అఫ్గానిస్థాన్ మధ్య మూడో టీ20 మ్యాచ్​ ఫలితం సూపర్​ ఓవర్​లో తేలింది. ఇరుజట్లు పోటాపోటీగా తలపడిన వేళ రెండో సూపర్​ ఓవర్​లో టీమ్ఇండియా 10 పరుగుల తేడాతో నెగ్గింది. అయితే ఈ మ్యాచ్​లో టీమ్ఇండియా కెప్టెన్ రోహిత్ శర్మ పూర్తి ఆధిపత్యం చలాయించాడు. తొలి ఇన్నింగ్స్​లో సెంచరీ (121) బాదిన హిట్​మ్యాన్, రెండు సూపర్​ ఓవర్లలో కలిపి 7 బంతుల్లో 25 పరుగులతో సత్తా చాటాడు.

అయితే భారత్ విజయంలో స్పిన్నర్ రవి బిష్ణోయ్​ పాత్ర కూడా చాలా కీలకమనే చెప్పవచ్చు. అయితే సాధారణంగా సూపర్​ ఓవర్​లో పేసర్లే బౌలింగ్ చేస్తారు. ఈ మ్యాచ్​లోనూ అఫ్గానిస్థాన్ రెండుసార్లు, టీమ్ఇండియా ఒకసారి పేసర్లనే బరిలోకి దింపింది. స్పిన్నర్లకు సూపర్ ఓవర్​ బౌలింగ్ ఇచ్చేందుకు కోచ్/ కెప్టెన్ పెద్దగా ఆసక్తి చూపరు. అయితే బుధవారం నాటి మ్యాచ్​లో మాత్రం రోహిత్ శర్మ బంతిని బిష్ణోయ్​కి అప్పగించి మ్యాచ్​లో ఫలితం సాధించాడు. ఇలా టీ20 సూపర్​ ఓవర్లలో తమ జట్టును గెలిపించిన స్పిన్నర్లెవరో చూసేద్దాం.

1. రవి బిష్ణోయ్ vs అఫ్గానిస్థాన్ (2024):రెండో సూపర్ ఓవర్​లో అఫ్గాన్ టార్గెట్ 12 పరుగులే. అయినా రోహిత్, బిష్ణోయ్​తో బౌలింగ్​ వేయించాడు. దీంతో అంతా కంగారు పడ్డారు. కానీ, బిష్ణోయ్ తొలి మూడు బంతుల్లో రెండు వికెట్లు పడగొట్టి భారత్​ను గెలిపించాడు.
2. మహీష్ తీక్షణ vs న్యూజిలాండ్ (2023): శ్రీలంక స్పిన్నర్ ఇటీవల న్యూజిలాండ్​తో జరిగిన సూపర్​ ఓవర్​లో బౌలింగ్ చేశాడు. తీక్షణ ఈ సూపర్ ఓవర్​లో కేవలం 8 పరుగులిచ్చి రెండు వికెట్లు పడగొట్టాడు. అనంతరం శ్రీలంక 9 పరుగులు చేసి మ్యాచ్​లో విజయం సాధించింది.
3. ఇమ్రాన్ తాహిర్​ vs శ్రీలంక (2019):2019లో శ్రీలంక టీ20 సిరీస్​కోసం సౌతాఫ్రికా వెళ్లింది. ఈ పర్యటనలో తొలి మ్యాచ్​ సూపర్ ఓవర్​కు దారి తీసింది. ఈ సూపర్ ఓవర్​లో సౌతాఫ్రికా 14 పరుగులు చేసింది. ఇక బంతి అందుకున్న ఇమ్రాన్ తాహిర్ శ్రీలంకను కట్టడి చేశాడు. అతడు కేవలం 5 పరుగులిచ్చి సౌతాఫ్రికాను గెలిపించాడు.
4. సునీల్ నరైన్- కరీబియన్ ప్రీమియర్ లీగ్: 2014 సీపీఎల్ టోర్నీలో గుయానా వారియర్స్​కు ప్రాతినిధ్యం వహించాడు. ఈ టోర్నీలో ట్రినిడాడ్ అండ్ టొబాగో జట్టుతో జరిగిన సూపర్​ ఓవర్​లో నరైన్ ఎకంగా మెయిడెన్ సాధించాడు. తొలుత బ్యాటింగ్ చేసిన గుయానా 11 పరుగులు చేసింది. తర్వాత నరైన్ ప్రత్యర్థి ట్రినిడాడ్​ను ఒక్క పరుగు చేయకుండా కట్టడి చేసి, సూపర్​ ఓవర్​ను మెయిడెన్​గా మలిచిన బౌలర్​గా సంచలనం సృష్టించాడు.
5. అక్షర్ పటేల్- ఇండియన్ ప్రీమియర్ లీగ్: 2021లో అక్షర్ పటేల్ దిల్లీ క్యాపిటల్స్​కు ప్రాతినిధ్యం వహించాడు. ఈ టోర్నీలో సన్​రైజర్స్ హైదరాబాద్​తో జరిగిన సూపర్​ ఓవర్​లో బౌలింగ్ చేసిన అక్షర్ దిల్లీని విజయ తీరాలకు చేర్చాడు. వార్నర్, విలియమ్సన్​ను కట్టడి చేసి 7 పరుగులు మాత్రమే ఇచ్చాడు. అనంతరం దిల్లీ 8 పరుగులు చేలి విజయం సాధించింది.