'ఆమె' కోసం సౌథీ డబ్ల్యూటీసీ జెర్సీ వేలం

కివీస్ బౌలర్ టిమ్ సౌథీ తన జెర్సీని వేలానికి పెట్టాడు. అలా వచ్చే మొత్తాన్ని క్యాన్సర్​తో బాధపడుతున్న హోలీ బీటీ అనే పాప వైద్యానికి ఇవ్వనున్నట్లు ప్రకటించాడు.

న్యూజిలాండ్ ఫాస్ట్ బౌలర్​ టిమ్ సౌథీ మంచి మనసు చాటుకున్నాడు. ఓ బాలిక వైద్య ఖర్చుల కోసం తన జెర్సీని వేలం వేయాలని నిర్ణయించాడు. వేలం ద్వారా వచ్చే మొత్తాన్ని హోలీ బీటీ అనే ఎనిమిదేళ్ల బాలిక వైద్యానికి ఇవ్వనున్నాడు.

"డబ్ల్యూటీసీ ఫైనల్​ సందర్భంగా నేను ధరించిన జెర్సీని వేలానికి పెట్టాలని అనుకున్నాను. దీనిపై డబ్ల్యూటీసీ కివీస్ స్క్వాడ్ మొత్తం సంతకాలు చేశారు. ఇదంతా హోలీ బీటీ అనే చిన్నారి కోసం చేస్తున్న చిన్న పని. ఆమె వైద్య ఖర్చులకు ఈ మొత్తాన్ని ఇవ్వనున్నాం. దీని ద్వారా బీటీ కుటుంబానికి కొంతవరకు సాయం అందుతుందనుకుంటున్నాను. హోలీ తల్లిదండ్రులు పడే వేదన చూసి ఓ తండ్రిగా నా మనసు కరిగిపోయింది. అందుకే చిన్న సాయం చేయాలనుకున్నాం."

-టిమ్ సౌథీ, కివీస్ క్రికెటర్.

2018 జులైలో అత్యంత అరుదైన న్యూరోబ్లాస్టోమా అనే క్యాన్సర్​ను హోలీ బీటీలో గుర్తించారు వైద్యులు. ఆమె గురించి తన క్రికెట్ సహచరుల ద్వారా తెలుసుకున్న సౌథీ.. ఆ చిన్నారికి ఎలాగైనా సహాయం చేయాలని పరితపించాడు. ఇటీవల డబ్ల్యూటీసీ ఫైనల్లో తాను ధరించిన జెర్సీని వేలానికి పెట్టాడు. దీనిపై కివీస్​ జట్టు సభ్యులంతా సంతకాలు చేశారు. ఇప్పటివరకు ఈ జెర్సీ కోసం 199 బిడ్లు దాఖలయ్యాయి. ఈ వేలానికి జులై 8 గురువారం రాత్రి 8.15 వరకు సమయం ఉంది.

ఇదీ చదవండి:కోహ్లీసేన ఆట చూసి బాత్రూం​లో దాక్కున్న స్టార్ క్రికెటర్