SL Vs Ban Asia Cup : ఆసియాకప్‌లో భాగంగా జరగనున్న మరో కీలక పోరుకు చూసేందుకు క్రికెట్ లవర్స్ సంసిద్ధంగా ఉన్నారు. సూపర్-4 మ్యాచ్లో డిఫెండింగ్‌ ఛాంపియన్‌ శ్రీలంకతో.. బంగ్లాదేశ్‌ శనివారం పోటీపడనుంది. బరిలో ఉండాలంటే ఇక తప్పక నెగ్గాల్సిందే అనే పరిస్థితిలో బంగ్లా ఉంది. సూపర్-4 తొలి మ్యాచ్లో పాకిస్థాన్ చేతిలో ఓటమిని చవి చూసిన బంగ్లా.. ఇప్పుడు లంక చేతిలో చిత్తైతే ఇక ఆ జట్టుకు కష్ట కాలమే. అయితే పాక్‌తో జరిగిన మ్యాచ్లో కనీస పోరాటం లేకుండానే చేతులెత్తేసిన బంగ్లా.. ఈ సారి ఏమాత్రం విజృంభిస్తుందో చూడాలి.
మరోవైపు బ్యాటింగ్‌ వైఫల్యం ఆ జట్టును వెంటాడుతోంది. దీంతో అనుభవజ్ఞులైన షకిబ్‌ అల్‌ హసన్‌, ముష్ఫికర్‌ రహీం ఈ మ్యాచ్లో సత్తా చాటాలని బంగ్లా కోరుకుంటోంది. ఫామ్‌లో ఉన్న నజ్ముల్‌ శాంటో గాయం కారణంగా దూరమవ్వడం బంగ్లాను ఇంకాస్త దెబ్బ తీసింది. ఇక వన్డే ఫార్మాట్లో తిరుగులేని ఫామ్‌లో ఉన్న శ్రీలంక.. మరో విజయాన్ని తమ ఖాతాలో వేసుకునేందుకు సిద్ధంగా ఉంది. అయితే అఫ్గానిస్థాన్‌తో జరిగిన గ్రూప్‌ ఆఖరి మ్యాచ్లో చివరిదాకా పోరాడి గెలుపు సొంతం చేసుకున్న లంక జట్టు.. బంగ్లాపైనా గెలిచి సూపర్-4లో శుభారంభం చేయాలని ఉవ్విళ్లూరుతోంది.