'అభిమానులారా.. భారత్​కు మన సహకారం అవసరం'

కరోనా సంక్షోభంపై పోరులో భారత్​కు దన్నుగా నిలవాలని తన అభిమానులను కోరాడు పాక్ మాజీ క్రికెటర్ షోయబ్ అక్తర్. భారత్​ కోసం నిధులు సమకూర్చాలని విజ్ఞప్తి చేశాడు. అలాగే, వైరస్​ తీవ్రత దృష్ట్యా ప్రజలు నిబంధనలు పాటించాలని కోరారు భారత క్రికెటర్లు జడేజా, రైనా.

కొవిడ్​ సంక్షోభాన్ని ఎదుర్కొంటోన్న భారత్​ను ఆదుకోవాలని పాకిస్థాన్​లోని తన అభిమానులను కోరాడు ఆ దేశ మాజీ పేసర్ షోయబ్​ అక్తర్. ఈ సమయంలో ప్రపంచ దేశాల సహకారం భారత్​కు అవసరమని తన యూట్యూబ్​ ఛానెల్​లో​ వ్యాఖ్యానించాడు.

"ఏ ప్రభుత్వానికైనా ఇలాంటి సంక్షోభాన్ని ఎదుర్కోవడం అసాధ్యం. భారత్​ను ఆదుకోవాలని పాక్ ప్రభుత్వాన్ని, నా అభిమానులను కోరుతున్నా. భారత్​కు చాలా ఆక్సిజన్ ట్యాంకులు అవసరం. ఆ దేశం కోసం విరాళాలు, నిధులు సమకూర్చి, ఆక్సిజన్​ ట్యాంకులను చేరవేయాలని విజ్ఞప్తి చేస్తున్నా."

- షోయబ్ అక్తర్, పాకిస్థాన్ మాజీ క్రికెటర్

భారత్​లో ఆరోగ్య వ్యవస్థ కుప్పకూలుతోందని అక్తర్​ పేర్కొన్నాడు. మహమ్మారి అందరినీ పీడిస్తోందన్న ఆయన.. ఈ సమయంలో ఒకరికొకరు తోడుగా నిలవాలని పిలుపునిచ్చాడు.

పోరులో ఐక్యం కావాలి..

మహమ్మారిపై పోరులో ప్రజలు ఏకమై, నిబంధనలు పాటించాలని కోరాడు భారత ఆల్​రౌండర్ రవీంద్ర జడేజా. నిస్వార్థంగా పనిచేస్తున్న వైద్య సిబ్బందికి కృతజ్ఞతలు తెలిపాడు.

జడేజా ట్వీట్

అందరూ ఇళ్లలోనే..

దేశ ఆరోగ్య వ్యవస్థ దుర్బలంగా మారుతోందని, మునుపెన్నడూ లేని విధంగా అనేకమంది ప్రాణాలకు ముప్పు పొంచి ఉందని భారత మాజీ క్రికెటర్​, ఐపీఎల్​లో సీఎస్​కే బ్యాట్స్​మన్ సురేశ్ రైనా అన్నాడు. వీలైనంత వరకు అందరూ ఇళ్లలోనే ఉండాలని కోరాడు.

రైనా ట్వీట్​

ఇదీ చూడండి:కరోనా ఉన్నా.. దిల్లీ మ్యాచ్​లు అక్కడే!