టీమ్ఇండియా, ఇంగ్లాండ్ జట్ల మధ్య ఏ క్రికెట్ మ్యాచ్ అయినా రసవత్తరంగా ఉంటుంది. ఇరు జట్లలోనూ నాణ్యమైన ఆటగాళ్లుంటారు. ఒకరిపై ఒకరు ఆధిపత్యం చెలాయించాలని చూస్తారు. ఈ క్రమంలోనే పలుమార్లు క్రికెటర్లమనే సంగతి మరిచిపోయి నోటికి పనిచెప్తారు. ముఖ్యంగా ఇంగ్లిష్‌ ప్లేయర్లు ఇష్టమొచ్చినట్లు దూషిస్తారు. అవి ఒక పరిమితి వరకైతే ఫర్వాలేదు కానీ.. శ్రుతి మించితే టీమ్ఇండియా నుంచి దీటైన సమాధానం ఉంటుంది. తాజాగా జరిగిన రెండో టెస్టులోనూ ఇలాంటి సంఘటనలే చోటుచేసుకున్నాయి. దీంతో గతంలో ఇరు జట్ల మధ్య జరిగిన కొన్ని వివాదాస్పద సంగతులు గుర్తుచేసుకుందాం.
రెచ్చగొట్టిన ఫ్లింటాఫ్‌.. దంచికొట్టిన యువీ
2007 టీ20 ప్రపంచకప్‌ దాదాపు అందరికీ గుర్తుండి ఉంటుంది. సెమీస్‌కు ముందు ఇంగ్లాండ్తో తప్పక గెలవాల్సిన మ్యాచ్‌లో టీమ్ఇండియా ఆల్‌రౌండర్‌ యువరాజ్‌సింగ్‌ రెచ్చిపోయాడు. స్టువర్ట్‌ బ్రాడ్‌ బౌలింగ్‌లో ఆరు సిక్సర్లు సంధించి భారత క్రికెట్లో అరుదైన రికార్డు నెలకొల్పాడు. ఈ క్రమంలోనే ఇంగ్లాండ్‌కు పీడకల మిగిల్చాడు. అయితే, యువీ అలా రెచ్చిపోవడానికి కూడా ఓ కారణం ఉందనే సంగతి కొందరికి తెలిసే ఉంటుంది. మాజీ ప్లేయర్‌ ఆండ్రూ ఫ్లింటాఫ్‌ అంతకుముందు ఓవర్లో యువరాజ్‌ను పీక కోస్తా అని అన్నాడు. దీంతో రెచ్చిపోయిన భారత బ్యాట్స్మన్ తర్వాతి ఓవర్లో బ్రాడ్‌ను చితకబాదాడు. అప్పుడు ఫ్లింటాఫ్‌ నోరు అదుపులో పెట్టుకొని ఉంటే ఆ రికార్డు నమోదయ్యేది కాదేమో!
అండర్సన్ బూతులు.. జడేజాకు కోతలు
ఇక 2014 ఇంగ్లాండ్ పర్యటనలో ఇంగ్లాండ్ స్టార్‌ పేసర్ జేమ్స్‌ అండర్సన్.. టీమ్ఇండియా ఆల్‌రౌండర్‌ రవీంద్ర జడేజాను బూతులు తిట్టాడు. తొలి టెస్టు రెండో రోజు భోజన విరామ సమయంలో ఇరు జట్ల ఆటగాళ్లు డ్రెస్సింగ్‌ రూమ్‌కు వెళ్లేటప్పుడు జడ్డూను వెనక్కిలాగిన ఇంగ్లిష్‌ పేసర్.. పరుష పదాలు ఉపయోగించి డ్రెస్సింగ్‌ రూమ్‌కు వెళ్లిపో అంటూ బెదిరించాడు. భోజన విరామం అనంతరం కూడా అండర్సన్ తనని దూషించాడని టీమ్ఇండియా ఆల్‌రౌండర్‌ పేర్కొన్నాడు. ఈ సంఘటనపై ఇరు జట్లు ఒకరిపై ఒకరు ఫిర్యాదులు చేసుకున్నాయి. చివరికి ఐసీసీ కలగజేసుకొని విచారణ జరిపి సరైన సాక్ష్యాలు లేవని జడ్డూకే మ్యాచ్ ఫీజ్‌లో 50 శాతం కోత విధించింది. కాగా, ఈ మ్యాచ్‌లో అంపైర్ ఆక్సెన్‌ఫర్డ్‌ సైతం పలుమార్లు అండర్సన్ బూతు మాటలు పలకడం విన్నానని చెప్పాడు. ఇక ఈ మ్యాచ్ డ్రాగా ముగిసింది.
స్టోక్స్ మాటలు.. కోహ్లీ తూటాలు
ఈ ఏడాది ఆరంభంలో ఇంగ్లాండ్ జట్టు భారత పర్యటనకు వచ్చినప్పుడు కూడా బెన్‌స్టోక్స్‌ టీమ్ఇండియా ఆటగాళ్లపై నోరుపారేసుకున్నాడు. నాలుగో టెస్టు తొలి రోజు స్టోక్స్ బ్యాటింగ్‌ చేస్తుండగా మహ్మద్‌ సిరాజ్‌ వేసిన ఓ బంతి బౌన్సర్‌గా వెళ్లింది. దీంతో కోపోద్రిక్తుడైన అతడు సిరాజ్‌ను ఏవో మాటలన్నాడు. అయినా, సిరాజ్‌ తిరిగి స్పందించకుండా బౌలింగ్ చేశాడు. అదే సమయంలో కెప్టెన్‌ కోహ్లీ కలగజేసుకొని స్టోక్స్తో మాట్లాడటానికి ప్రయత్నించాడు. రెచ్చిపోయిన ఇంగ్లిష్‌ ఆల్‌రౌండర్‌ మరిన్ని మాటలన్నాడు. కోహ్లీ కూడా అంతే దీటుగా మాటలతూటాలు పేల్చాడు. అయితే, అంపైర్లు కలగజేసుకొని ఇద్దరినీ సముదాయించారు. దీంతో వివాదం అక్కడితో సద్దుమణిగింది. ఈ మ్యాచ్‌లో టీమ్ఇండియా ఘన విజయం సాధించడమే కాకుండా 3-1 తేడాతో సిరీస్‌ కైవసం చేసుకుంది.