Sanju Samson Century Celebration :తాజాగా జరిగిన సౌతాఫ్రికా సిరీస్ మూడో వన్డేలో టీమ్ఇండియా స్టార్ బ్యాటర్ సంజూ శాంసన్ సెంచరీతో చెలరేగాడు. ఎంతో కాలం తర్వాత భారత జట్టు నుంచి పిలుపును అందుకున్న ఈ స్టార్ ప్లేయర్, తనకు వచ్చిన అవకాశాన్ని సద్వినియోగం చేసుకున్నాడు. 114 బంతుల్లో 108 పరుగులు చేసి అందరినీ ఆశ్చర్యపరిచాడు. 66 బంతుల్లో హాఫ్ సెంచరీ పూర్తి చేసుకుని ఆ తర్వాత 110 బంతుల్లో సెంచరీ సాధించాడు. అలా తనపై ట్రోల్స్ చేసిన వారికి తన బ్యాట్తో సమాధానం చెప్పాడు.
అయితే సెంచరీ మార్క్ అందుకున్నాక సంజూ శాంసన్ తనదైన స్టైల్లో సంబరాలు చేసుకున్నాడు. తన బైసెప్స్‌ను డగౌట్‌ వైపు చూపిస్తూ ధీమా వ్యక్తం చేశాడు. దీన్ని చూసిన ఫ్యాన్స్ ఆశ్చర్యపోయారు. ప్రస్తుతం దీనికి సంబంధించిన వీడియో నెట్టింట తెగ ట్రెండ్ అవుతోంది.
మరోవైపు సంజూ అభిమానులు తన కమ్బ్యాక్ చూసి భావోద్వేగానికి లోనవుతున్నారు. ఎంతో కాలంగా దీనికోసం ఎదురుచూస్తున్నామని ఇప్పటికైనా తనకు ఈ అవకాశం దక్కినందుకు చాలా ఆనందంగా ఉందంటూ కామెంట్లు పెడుతున్నారు.
గత కొంత కాలంగా సంజూకు సరైన అవకాశాలు రావట్లేదు. ఒకటి రెండు మ్యాచ్‌లు తప్ప అతడు ఆడేందుకు పెద్దగా ఛాన్స్ దొరకలేదు. అయితే ఆ బాధలన్నింటినీ దిగమింగుకుని ఈ మ్యాచ్లో సంజూ శాంసన్ అదరగొట్టాడు. తన ఇన్నింగ్స్లో స్కోర్ బోర్డును పరుగులు పెట్టించి జట్టును ఆదుకున్నాడు.