Rohit Sharma Coach Dinesh Lad : 'బ్యాటింగ్​లో రోహిత్ మెరుగుపడటానికి కారణం అదే'.. సీక్రెట్ చెప్పిన చిన్ననాటి కోచ్!

Rohit Sharma Coach Dinesh Lad : అతడు పది ఓవర్లు క్రీజ్‌లో ఉన్నాడంటే ఇక ప్రత్యర్థులు మ్యాచ్‌పై ఆశలు వదులుకోవాల్సిందే. కుదురుకున్నాడంటే ఇక ఆ రోజు చాలా రికార్డులు గల్లంతైనట్లే అని అనుకోవాల్సిందే. బ్యాట్​ పట్టుకుని అలవోకగా సిక్స్‌లు కొట్టేయగల సమర్థుడు అతను. ముఖ్యంగా ప్రపంచ కప్‌ అంటే గాడ్‌ మోడ్‌లోకి మారిపోతాడు ఆ స్టార్​ బ్యాటర్​. మెగా సమరంలో పరుగుల ఎలా పారించాలో అతడికి బాగా తెలుసు. ఇప్పటికే అర్థమైపోయిందిగా అతడు ఎవరని!! అతనెవరో కాదు మన హిట్‌మ్యాన్‌ రోహిత్ శర్మ. పాకిస్థాన్​తో టీమ్ఇండియా శనివారం ఢీకొట్టనున్న నేపథ్యంలో రోహిత్ గురించి అతడి చిన్ననాటి కోచ్ ఏమన్నాడో తెలుసుకుందామా?

Rohit Sharma Coach Dinesh Lad : వన్డే ప్రపంచకప్​లో​ భాగంగా శనివారం భారత్​-పాకిస్థాన్ మధ్య హోరాహోరీ మ్యాచ్ జరగనుంది. ఈ మ్యాచ్ కోసం కోట్లాది క్రికెట్ ప్రియులు వేచి చూస్తున్నారు. బలమైన బ్యాటింగ్, బౌలింగ్​ లైనప్​తో టీమ్​ఇండియా మంచి ఫామ్​లో ఉంది. పాక్ కూడా కెప్టెన్ బాబర్ ఆజమ్​, రిజ్వాన్​ వంటి యువ ప్లేయర్లతో పటిష్ఠంగా ఉంది. అయితే ప్రస్తుతం అందరి దృష్టి టీమ్​ఇండియా బ్యాటర్​, కెప్టెన్ రోహిత్​ శర్మపైనే ఉంది. ఎందుకంటే వరల్డ్​కప్​లో ఆస్ట్రేలియాతో భారత్​ ఆడిన తొలి మ్యాచ్​లో రోహిత్ డకౌట్​ అయ్యాడు. అఫ్గాన్​తో జరిగిన మ్యాచ్​లో సెంచరీతో(131) అదరగొట్టాడు. అంతేగాక ఇంటర్నేషనల్ కెరీర్​లో అత్యధిక సిక్స్​లు కొట్టిన బ్యాటర్​గా రికార్డులకెక్కాడు. ఈ క్రమంలో రోహిత్​ బ్యాటింగ్ గురించి ఆయన చిన్ననాటి కోచ్ ఆసక్తికర వ్యాఖ్యలు చేశాడు. అవేంటో చూద్దాం.

రోహిత్ శర్మ షాట్ల ఎంపిక ప్రస్తుతం చాలా బాగుందని అన్నాడు రోహిత్ చిన్నప్పటి కోచ్ లాల్​చంద్ రాజ్​పుత్​. అందుకే రోహిత్​ వన్డే క్రికెట్​లో మూడు డబుల్ సెంచరీలు, అంతర్జాతీయ టీ20 ఫార్మాట్​లో నాలుగు శతకాలు, టెస్ట్ క్రికెట్​లో ఒక డబుల్ సెంచరీ బాదాడని అన్నాడు. ప్రస్తుతం రోహిత్​ పుల్ షాట్​, లాఫ్ట్​డ్​ షాట్లతో అదరగొడుతున్నాడని చెప్పాడు.

2009 టీ20 వరల్డ్​కప్, 2011 వన్డే వరల్డ్ కప్​లో రోహిత్ శర్మకు పెద్దగా అవకాశాలు రాలేదని రోహిత్ శర్మ చిన్ననాటి కోచ్ దినేశ్ లాడ్ అన్నాడు. ఆ తర్వాత 2013 ఛాంపియన్స్ ట్రోఫీలో రోహిత్ శర్మను అప్పటి టీమ్​ఇండియా కెప్టెన్ మహేంద్ర సింగ్ ధోనీ ఓపెనర్​గా పంపించాడని.. అప్పటి నుంచి రోహిత్​ వెనుదిరిగి చూసుకోలేదని చెప్పాడు.

రోహిత్ శర్మ2007లో అంతర్జాతీయ క్రికెట్‌లోకి అరంగేట్రం చేశాడు. అదే ఏడాది జూన్ 23 ఐర్లాండ్‌తో భారత్ తలపడిన మ్యాచే రోహిత్​కు మొదటిది. ఆ తర్వాత రోహిత్​ ప్రయాణం ఒడుదొడుకుల మధ్య సాగింది. 2011 తర్వాత తన బ్యాటింగ్ స్టైల్​ను మార్చుకున్నాడు రోహిత్. పుల్ షాట్​, కట్ షాట్​, స్ట్రైట్​ డ్రైవ్​, ఫ్లిక్ షాట్లలో ప్రావీణ్యం సంపాదించాడు. ఆ తర్వాత ఆడిన ఐపీఎల్​, టీ20 వరల్డ్ కప్​లలో ఆ షాట్లను ఆడి రోహిత్ మరింత ఆరితేరి ప్రత్యర్థి బౌలర్లకు చుక్కలు చూపించాడు. ఈ క్రమంలో రోహిత్​పై ప్రశంసలు కురిపించాడు టీమ్​ఇండియా మాజీ క్రికెటర్​ లాల్​చంద్ రాజ్​పుత్​. షాట్ల ఎంపికలో రోహిత్ మెరుగుపడడానికి టీ20 ఫార్మాటే కారణమని ఆయన ఈటీవీ భారత్​కు చెప్పాడు.