Rohit Effect On MI Instagram Account : ముంబయి ఇండియన్స్ కెప్టెన్ బాధ్యతల నుంచి రోహిత్ శర్మను తప్పించడం, హిట్మ్యాన్ ఫ్యాన్స్తోపాటు, ఎమ్ఐ (MI) అభిమానులు జీర్ణించుకోలేకపోతున్నారు. దీంతో రాత్రికి రాత్రే దాదాపు 4 లక్షల మంది రోహిత్ ఫ్యాన్స్, ముంబయి ఇండియన్స్ (Mumbai Indians) అధికారిక సోషల్ మీడియా అకౌంట్ను అన్ఫాలో కొట్టేశారు. అయితే ఫ్రాంచైజీ, రోహిత్తో సంప్రదించే ఇంత పెద్ద నిర్ణయం తీసుకొని ఉంటుందని పలువురు క్రీడా విశ్లేషకులు అభిప్రాయపడుతున్నారు. అయినప్పటికీ జట్టుకు 5 టైటిళ్లు అందించిన సక్సెస్ఫుల్ కెప్టెన్కు దక్కాల్సిన గౌరవం ఇది కాదంటూ ఫ్యాన్స్ సోషల్ మీడియాలో అసహనం వ్యక్తపరుస్తున్నారు. వారు ఫ్రాంచైజీ నిర్ణయాన్ని వ్యతిరేకిస్తున్నారు. కాగా, తాజా పరిణామంతో చెన్నై సూపర్ కింగ్స్ సోషల్ మీడియాలో అత్యధిక ఫాలోవర్లు కలిగిన ఫ్రాంచైజీగా నిలిచింది. ఇంతకాలం ముంబయి టాప్లో ఉండేది.
మరోవైపు హార్దిక్ పాండ్యను కెప్టెన్గా ప్రకటించిన తర్వాత ముంబయి ఇండియన్స్, తమ అధికారిక సోషల్ మీడియా అకౌంట్లో రోహిత్కు సానుకూలంగా ఓ వీడియో పోస్ట్ చేసింది. '2013లో నువ్వు నాయకత్వ బాధ్యతలు తీసుకొని నాపై నమ్మకం ఉంచమని కోరావు. గెలుపు, ఓటముల్లో ఎల్లప్పుడూ నవ్వుతూ ఉండాలన్నావు. ఈ పదేళ్లలో ఆరు టోఫ్రీలు (5 ఐపీఎల్, 1 ఛాంపియన్స్ లీగ్) అందించావు. ఎప్పటికీ నువ్వు మా కెప్టెన్వే. ముంబయి ఇండియన్స్ పై నీ ముద్ర చెరగనిది. థాంక్యూ, కెప్టెన్ రోహిత్. ముంబయి కా రాజా' అంటూ ఎమోషనల్గా రాసుకొచ్చింది.
సూర్య హార్ట్ బ్రేక్ :ఇదిలా ఉండగా టీమ్ఇండియా స్టార్ బ్యాటర్ సూర్యకుమార్ యాదవ్ తాజాగా 'హార్ట్ బ్రేక్' ఇమేజ్ ఇన్స్టాగ్రామ్ స్టోరీలో షేర్ చేశాడు. రోహిత్ను కెప్టెన్సీ నుంచి తప్పించినందుకే సూర్య ఇలా రియాక్ట్ అయ్యాడని ఫ్యాన్స్ అంటున్నారు. కాగా, గతనెల హార్దిక్ను ముంబయి ట్రేడ్ చేసుకున్నాక జస్ప్రీత్ బుమ్రా 'సైలెన్స్' అని ఇన్స్టా స్టోరీ పోస్ట్ చేశాడు. బహుషా ఇలా జరుగుతుందని బుమ్రా అప్పుడే ఊహించాడా అని చర్చ నడుస్తోంది.