ఎవరూ ఊహించని రీతిలో అఫ్గానిస్థాన్ను తాలిబన్లు హస్తగతం చేసుకున్నారు. ఈ నేపథ్యంలో అక్కడి పరిస్థితి గందరగోళంగా మారింది. దీంతో ఆ దేశ స్టార్ క్రికెటర్ రషీద్ ఖాన్ ఆందోళన చెందుతున్నాడు. ఈ విషయాన్ని ఇంగ్లాండ్ మాజీ క్రికెటర్ కెవిన్ పీటర్సన్ తెలిపాడు. ఆ దేశంలో ఉన్న తన కుటుంబాన్ని అక్కడి నుంచి బయటకు రప్పించలేకపోతున్నందుకు రషీద్ చాలా బాధపడుతున్నాడని చెప్పాడు. దీంతో అతడు తీవ్ర ఒత్తిడికి గురైనట్లు వెల్లడించాడు. అయితే ఇవన్నీ మర్చిపోయి రషీద్ ముందుకు సాగగలడన్న విశ్వాసం తనకు ఉందని చెప్పాడు.
అఫ్గానిస్థాన్లో ప్రస్తుతం నెలకొన్న సంక్షోభం వల్ల కాబుల్లోని హమీద్ కర్జాయ్ ఇంటర్నేషనల్ విమానాశ్రయానికి రాకపోకలు నిలిచిపోయాయి. దీంతో అక్కడి ప్రజలు దేశం దాటలేకపోతున్నారు. ఈ నేపథ్యంలోనే రషీద్ పరిస్థితిపై పీటర్సన్ వ్యాఖ్యలు చేశాడు.