ప్రపంచ టెస్టు ఛాంపియన్‌షిప్‌ ఫైనల్ కోసం ఎదురు చూస్తున్న అభిమానులకు ఓ దుర్వార్త! సౌథాంప్టన్ వేదికగా జరగనున్న ఫైనల్కు వర్షగడం పొంచి ఉంది. రిజర్వు డేతో కలిసి మొత్తం ఆరు రోజులు సాధారణం నుంచి భారీ వర్షపాతం నమోదయ్యే అవకాశం ఉందని సమాచారం. వాతావరణ శాఖ, వాతావరణ వెబ్‌సైట్లు ఈ విషయాన్నే తెలియజేస్తున్నాయి. దాదాపుగా 80% వర్షం కురుస్తుందనే చూపిస్తున్నాయి.
రోజ్‌బౌల్‌లో శుక్రవారం నుంచి భారత్, న్యూజిలాండ్ ఫైనల్లో తలపడనున్నాయి. ఇప్పటికే రెండు జట్లు తుదిపోరు కోసం కఠోర సాధన చేస్తున్నాయి. రెండూ అత్యుత్తమ జట్లే కావడం వల్ల ఐదు రోజుల పాటు ఆటను ఆస్వాదించాలని అభిమానులు భావిస్తున్నారు. అవాంతరాలు ఎదురైనా రిజర్వు డే ఉందని సంతోషించారు. ఇప్పుడు ఆట జరిగే అన్ని రోజులూ వర్షగండం ఉందని తెలియడం వల్ల ఉసూరుమంటున్నారు.
వర్షం పడి చల్లని వాతావరణ ఉంటే మాత్రం కివీస్‌కే ఎక్కువ ప్రయోజనం ఉంటుందని విశ్లేషకులు చెబుతున్నారు. 2019 వన్డే ప్రపంచకప్‌ సెమీస్‌ను ఉదాహరణగా చూపిస్తున్నారు. సౌథీ, బౌల్ట్‌, హెన్రీ, జేమీసన్‌ తమ పేస్‌, స్వింగ్‌తో భారత్ బ్యాటర్లను ఇబ్బంది పెడతారని అంటున్నారు. టీమ్‌ఇండియా బౌలర్లూ తక్కువేం కాదని మొత్తంగా బ్యాటర్లకే ఇబ్బందులు ఉంటాయని పేర్కొంటున్నారు.