భారత్‌లో కిక్రెట్‌ను ఒక మతంలా ఆరాధిస్తే.. క్రికెటర్లను దేవుళ్లతో సమానంగా పూజిస్తారు. నిత్యం వారు ఏమి చేసినా సంచలనమే! కానీ, ఈ హంగూ ఆర్భాటాలకు దూరంగా ఉంటూ అప్పగించిన బాధ్యతలను క్రమశిక్షణ, అంకితభావంతో శ్రద్ధగా నిర్వహించడం ద్రవిడ్(Rahul Dravid Coach) స్టైల్‌. బ్యాటింగ్‌ చేస్తున్నప్పుడు మెరుపులు ఎక్కడా కనిపించవు.. కానీ, అతని షాట్లకు నేలమీద చిమ్మిన నీటి వలే బంతి బౌండరీలైన్‌ దాటేస్తుంది. ఒక వైపు వికెట్లు పడుతున్నా మరో వైపు గోడలా నిలిచి ప్రత్యర్థి బౌలర్ల సహనానికి పరీక్ష పెట్టడం అతనికే చెల్లింది. ఇన్నింగ్స్‌ ముగిశాక స్కోర్‌ బోర్డు చూస్తే.. సింగిల్స్‌-డబుల్స్‌తోనే ఇన్ని పరుగులు చేశాడా! అని నోరెళ్లబెట్టడం ప్రత్యర్థులవంతవుతుంది. ఏదో అంటుగడుతున్నట్లు శ్రద్ధగా క్రికెట్‌ టెక్ట్స్‌బుక్‌లోని అన్ని షాట్లూ ఆడగల సత్తా ద్రవిడ్(Dravid Coaching Career) సొంతం. రాహుల్ మైదానం వీడినా భారత క్రికెట్‌కు తన శక్తియుక్తులు ధారపోస్తున్నాడు. వ్యక్తుల స్థాయిలో కన్నా వ్యవస్థీకృత మార్పులతో క్రికెట్‌ను బలోపేతం చేయడాన్ని ద్రవిడ్ నమ్ముతాడు. తాజాగా సీనియర్ జట్టుకు కోచ్గా ఎంపిక కావడం వల్ల.. భారత జట్టులో, జట్టు ఎంపికలో వ్యవస్థీకృత మార్పులు ఖాయంగా కనిపిస్తున్నాయి.
వివిధ జట్లకు కోచ్గా ద్రవిడ్(Rahul Dravid India Coach News) ఇప్పటికే సత్తాచాటాడు. 2014 నుంచి రెండేళ్ల పాటు ఐపీఎల్‌లో రాజస్థాన్‌ రాయల్స్‌ జట్టుకు కోచ్గా పనిచేశాడు. 2016లో అండర్-19, భారత్‌- ఏ జట్లకు కోచ్గా బాధ్యతలు తీసుకున్న అతను.. యువ ఆటగాళ్లను సానబెట్టాడు. తన శిక్షణలో 2016 అండర్-19 ప్రపంచకప్‌లో రన్నరప్‌గా నిలిచిన భారత్‌.. 2018లో కప్పు అందుకుంది. ఆ సమయంలోనే సీనియర్ జట్టు కోచ్గా వ్యవహరించాలని బీసీసీఐ కోరినా.. యువ ఆటగాళ్ల కోసం సున్నితంగా తిరస్కరించాడు. 2019 నుంచి జాతీయ క్రికెట్‌ అకాడమీ (ఎన్‌సీఏ) డైరెక్టర్‌గా పదవి చేపట్టి.. అక్కడికి వచ్చే భారత ఆటగాళ్లను ఉత్తమంగా తీర్చిదిద్దుతున్నాడు. ఇటీవల టీమ్ఇండియా ఇంగ్లాండ్‌ పర్యటనలో ఉండగా.. పరిమిత ఓవర్ల సిరీస్‌ కోసం శ్రీలంక వెళ్లిన మరో భారత జట్టుకు ద్రవిడ్ తాత్కాలిక కోచ్గా పనిచేశాడు.
షాడో టూర్లతో..
భారత క్రికెట్‌ విజయాల్లో షాడో టూర్ల పాత్ర చాలా ఉంది. భారత సీనియర్ క్రికెట్‌ జట్టు ఏదైనా దేశంలో పర్యటించడానికి ముందు 'ఏ' టీమ్ అక్కడ సిరీస్‌ ఆడుతుంది. భారత సీనియర్ జట్టుకు ఎంపికయ్యేందుకు సిద్ధంగా ఉన్న క్రీడాకారులు ఈ జట్టులో ఆడతారు. దీంతో వారు అక్కడి వాతావరణ పరిస్థితులకు, పిచ్‌లకు అలవాటు పడతారు. అంతేకాదు.. ప్రత్యర్థుల ఆటశైలిని ఆకళింపు చేసుకొంటారు. సీనియర్ జట్టులో ప్రవేశించాక.. ఆ దేశ పర్యటనకు వచ్చినప్పుడు ఈ అనుభవం వారికి అక్కరకొస్తోంది. శుభ్‌మన్‌ గిల్‌, మయాంక్‌ అగర్వాల్‌, హనుమ విహారి వంటి క్రీడాకారులు ఇలానే సీనియర్ జట్టులోకి వచ్చారు. సీనియర్ల బృందానికి ఎంపికై తుదిజట్టులో ఆడకపోయినా.. బలమైన బ్యాకప్‌ క్రీడాకారుడిగా రిజర్వు బెంచ్‌లో ఉంటారు. అందుకే ఈ టూర్ల నిర్వహణకు రాహుల్ బలంగా మద్దతు ఇస్తాడు.
అండర్-19లో ఒక్కసారే అవకాశం
అండర్-19 వరల్డ్‌కప్‌ల విషయంలో ద్రవిడ్(Dravid Under 19 Coach) విప్లవాత్మక నిర్ణయం తీసుకొన్నాడు. ఏ క్రీడాకారుడైనా ఒక్కసారి అండర్-19 ప్రపంచ కప్‌కు వెళ్లే జట్టులో ఉంటే, మరోసారి అండర్-19లో పాల్గొనే అవకాశం అతనికి ఉండదు. ఈ విధంగా ద్రవిడ్ మార్పులు చేశాడు. దీంతో వయస్సుకు సంబంధించి తరచూ తలెత్తే వివాదాలకు ఫుల్‌స్టాప్‌ పడింది. అంతేకాదు ఎక్కువ మంది క్రీడాకారులు అండర్-19 వరల్డ్‌ కప్‌ ఆడేందుకు అవకాశం లభించింది. ఈ విషయంపై ఓ సందర్భంలో ద్రవిడ్ మాట్లాడుతూ.. అండర్-19 స్థాయి క్రికెట్‌లో ఫలితం కోసం చూడకూడదు.. క్రీడాకారుల అభివృద్ధి గురించి చూడాలని వెల్లడించాడు.
ఆటగాళ్ల- కోచ్ బంధం బలోపేతం..!