టీమ్ఇండియా సీనియర్‌ స్పిన్నర్ రవిచంద్రన్‌ అశ్విన్ లౌక్యం ప్రదర్శించాడు! మాజీ క్రికెటర్ సంజయ్ మంజ్రేకర్(Sanjay Manjrekar)కు పరోక్షంగా తిరుగులేని పంచ్‌ ఇచ్చాడు. తన ప్రకారం అశ్విన్ ఇంకా 'ఆల్‌టైం గ్రేట్' జాబితాలో చేరలేదని చెప్పినందుకు ఇలా స్పందించాడు. ఈఎస్‌పీఎన్‌ క్రిక్‌ఇన్ఫో నిర్వహించిన చర్చా కార్యక్రమంలో మంజ్రేకర్ ఈ విధంగా మాట్లాడాడు.
"ఆల్‌టైం గ్రేట్ అన్నది క్రికెటర్లకు ఇచ్చే అత్యున్నత ప్రశంస, గుర్తింపు. డాన్‌ బ్రాడ్‌మన్‌, సోబర్స్‌, గావస్కర్‌, తెందూల్కర్‌, విరాట్‌ తదితర క్రికెటర్లు నా పుస్తకంలో ఆల్‌టైం గ్రేట్. అశ్విన్ ఇంకా అక్కడికి చేరుకోలేదని గౌరవంగా చెబుతున్నా."
- సంజయ్ మంజ్రేకర్, క్రికెట్ కామెంటేటర్
అతడి వ్యాఖ్యలపై సోషల్‌ మీడియాలో దుమారం రేగింది. అశ్విన్ గొప్పవాడే అంటూ అనేకమంది మద్దతుగా నిలిచారు. నేథన్‌ లైయన్‌ కంటే అశ్విన్ మెరుగని ఆసీస్‌ మాజీ సారథి ఇయాన్‌ ఛాపెల్‌ అన్నాడు. పాక్‌ మాజీ క్రికెటర్ సల్మాన్ భట్‌ కూడా ఈ అభిప్రాయంతో ఏకీభవించాడు. మరోవైపు అశ్విన్ అభిమానులు మాత్రం మంజ్రేకర్‌ను ట్రోల్‌ చేశారు. గతంలో రవీంద్ర జడేజాను 'బిట్స్‌ అండ్‌ పీసెస్‌' క్రికెటర్‌గా వర్ణించిన విధానాన్ని గుర్తు చేశారు.
సంజయ్ మంజ్రేకర్ 'ఆల్‌టైం గ్రేట్' వ్యాఖ్యలకు అశ్విన్ కూడా సున్నితంగా హాస్యస్ఫూర్తి(Ashwin to Manjrekar)తో స్పందించాడు. 'అపరిచితుడు' చిత్రంలో విక్రమ్‌ మీమ్‌ను రీట్వీట్ చేశాడు. అందులో రామం తన మిత్రుడు చారీతో.. 'అలా అనకురా చారీ, మనసంతా బాధగా ఉంటుంది'(Ashwin Aparichitudu meme) అన్న మాటలు ఉన్నాయి. అయితే ఆ మాటలు తమిళంలో ఉండటం వల్ల 'తమిళం అర్థంకాని వాళ్ల కోసం, ఈ మాటలు అపరిచితుడు చిత్రంలోనివి' అని మరో ట్వీట్‌లో వివరణ ఇచ్చాడు.
ఇదీ చూడండి..IPL 2021: టోర్నీ అప్పటి వరకు అంటే కష్టమే!
