IOA President PT Usha: భారత ఒలింపిక్ సంఘం (ఐఓఏ) అధ్యక్షురాలిగా పరుగుల రాణి పీటీ ఉష ఏకగ్రీవంగా ఎన్నికైంది. 95 ఏళ్ల చరిత్రను ఆమె తిరగరాసింది. ఎందుకంటే ఇప్పటి వరకు ఐఓఏ అధ్యక్షురాలిగా మహిళలు ఎన్నడూ లేరు. అయితే అధ్యక్ష పదవికి మరెవరూ నామినేషన్ వేయకపోవడంతో ఆమెకే అత్యున్నత పదవి వరించింది. ఈ మేరకు కేంద్ర న్యాయశాఖ మంత్రి కిరణ్ రిజిజు ట్వీట్ చేశారు. పీటీ ఉషకు శుభాకాంక్షలు తెలిపారు.
"భారత ఒలింపిక్ సంఘం అధ్యక్షురాలిగా ఎన్నికైనందుకు దిగ్గజ గోల్డెన్ గర్ల్ శ్రీమతి పీటీ ఉషకు అభినందనలు. ప్రతిష్ఠాత్మక ఐఓఏకు ఆఫీస్ బేరర్లు అయినందుకు క్రీడాకారులందరినీ అభినందిస్తున్నాను. మీ అందర్నీ చూసి దేశం గర్విస్తోంది"
- కిరణ్ రిజిజు, కేంద్ర మంత్రి
భారత ఒలింపిక్ సంఘం అధ్యక్ష ఎన్నికలకు పీటీ ఉష ఇటీవలే నామినేషన్ దాఖలు చేశారు. ఆమెతో పాటు 14 మంది కార్యవర్గ సభ్యులు కూడా వివిధ పదవులకు నామినేషన్లు సమర్పించారు. అధ్యక్ష పదవికి మాత్రం ఎవరూ నామినేషన్ వేయలేదు. దీంతో పీటీ ఉష ఎన్నిక లాంఛనమైంది. ఇప్పటివరకు పీటీ ఉష వివిధ ఆసియా గేమ్స్లో గోల్డ్ మెడల్స్ సాధించారు. 1984లో జరిగిన ఒలింపిక్స్లో 400 మీటర్ల హర్డల్స్ ఈవెంట్ ఫైనల్లో నాలుగో స్థానంలో నిలిచారు.
ఇండియన్ ఒలింపిక్ అసోసియేషన్లోని అధ్యక్ష పదవి మినహా వివిధ స్థానాలకు డిసెంబరు 10న ఎన్నికలు జరగనున్నాయి. సీనియర్ వైస్ ప్రెసిడెంట్, రెండు వైస్ ప్రెసిడెంట్ స్థానాలు(ఒకటి పురుషులకు, ఒకటి మహిళ), కోశాధికారి, రెండు జాయింట్ సెక్రటరీ స్థానాలు(పురుషుడు, మహిళ), 6 కార్యనిర్వాహక మండలి సభ్యుల స్థానాలు ఉన్నాయి. ఈ ఆరుగురిలో ఇద్దరు అథ్లెట్స్ కమిషన్ ప్రతినిధులు ఉంటారు.
ఇవీ చదవండి:
