నెట్టింట షమీపై విమర్శలు.. మాజీలు ఏమన్నారంటే?

టీ20 ప్రపంచకప్(t20 worldcup 2021)​లో భాగంగా పాకిస్థాన్​తో జరిగిన మ్యాచ్​లో భారత్ ఓడిపోయింది. అయితే ఈ ఓటమికి కారణం టీమ్ఇండియా పేసర్ షమీ(mohammed shami news) అంటూ కొందరు నెటిజన్లు విమర్శలు చేస్తున్నారు. దీనిపై స్పందించిన పలువురు మాజీలు.. ఇలాంటి కామెంట్లు సరికావని వ్యాఖ్యానించారు.

టీ20 ప్రపంచకప్​(t20 worldcup 2021)లో భాగంగా పాకిస్థాన్​తో జరిగిన మ్యాచ్​లో ఘోర పరాభవం ఎదుర్కొంది టీమ్ఇండియా. దీంతో జట్టుపైన తీవ్ర విమర్శలు వస్తున్నాయి. ముఖ్యంగా భారత పేసర్ మహ్మద్ షమీ(mohammed shami news)పై కొందరు నెటిజన్లు విద్వేషపూరిత వ్యాఖ్యలు చేస్తున్నారు. ఈ ఓటమికి కారణం షమీ అంటూ కామెంట్లు పెడుతున్నారు. తాజాగా ఈ విషయంపై స్పందించారు పలువురు మాజీలు. ఇలాంటి వ్యాఖ్యలు సరికాదంటూ వ్యాఖ్యానించారు.

• "సోషల్ మీడియాలో షమీపై జరుగుతున్న దాడి ఆశ్చర్యానికి గురిచేసింది. మనమంతా షమీకి మద్దతుగా నిలబడాలి. అతడొక ఛాంపియన్. భారత జెర్సీ ధరించిన ప్రతి ఒక్కరు తమ హృదయంలో భారతీయత కలిగి ఉంటారు. తర్వాత మ్యాచ్​లో రెచ్చిపో షమీ" అంటూ ఈ పేసర్​కు మద్దతుగా నిలిచాడు మాజీ క్రికెటర్ వీరేంద్ర సెహ్వాగ్.
• "గతంలో భారత్.. పాక్​పై ఓడిపోయినపుడు నన్ను పాకిస్థాన్​కు వెళ్లమని ఎవరూ అనలేదు. గతం గురించి నేను చెబుతున్నా. ఇలాంచి చెత్త వ్యాఖ్యలు సమంజసం కాదు" అని వెల్లడించాడు ఇర్ఫాన్ పఠాన్.
• "షమీ మేమంతా నిన్ను ప్రేమిస్తున్నాం" అంటూ ఓ పోస్ట్ చేశాడు వెటరన్ స్పిన్నర్ హర్భజన్ సింగ్.
• "మేమంతా నిన్ను చూసి గర్విస్తున్నాం భయ్యా" అంటూ ట్వీట్ చేశాడు స్పిన్నర్ చాహల్.
• "ఓ భారతీయ క్రికెటర్​గా మనమంతా షమీని చూసి గర్వపడాలి. పాక్​పై ఓటమి తర్వాత అతడిపై విమర్శలు అనేవి బాధ కలిగించాయి" అంటూ కామెంట్ చేశాడు మాజీ పేసర్ ఆర్పీ సింగ్.

ఈ మ్యాచ్​లో భారత్​పై పాకిస్థాన్ 10 వికెట్ల తేడాతో గెలిచింది. టాస్ ఓడి మొదట బ్యాటింగ్​కు దిగిన కోహ్లీసేన తడబడింది. పాక్ పేసర్లు రెచ్చిపోవడం వల్ల నిర్ణీత 20 ఓవర్లలో 7 వికెట్ల నష్టానికి 151 పరుగులు చేసింది. అనంతరం బ్యాటింగ్​కు దిగిన పాక్​కు ఓపెనర్లు విజయాన్నందించారు. బాబర్ అజామ్ (68*), రిజ్వాన్ (79*) అర్ధసెంచరీలతో చెలరేగారు. ఇక ఈ మ్యాచ్​లో పేసర్ షమీ 3.5 ఓవర్లు వేసి 43 పరుగులు సమర్పించుకున్నాడు.