వరల్డ్​ కప్​ - కోహ్లీ సూపర్ సెంచరీ - దక్షిణాఫ్రికా ముందు భారీ లక్ష్యం

ODI World Cup 2023 Kohli 49 Century : india vs south africa: వన్డే ప్రపంచకప్‌లో (ICC Cricket World Cup 2023) భాగంగా టీమ్​ ఇండియా, దక్షిణాఫ్రికాల మధ్య జరిగిన మ్యాచ్‌లో టీమ్‌ ఇండియా 327 పరుగుల లక్ష్యాన్ని సఫారీ జట్టు ముందుంచింది. టీమ్​ ఇండియా ఇన్నింగ్స్​లో కోహ్లీ సెంచరీతో మెరిశాడు.

ODI World Cup 2023 Kohli 49 Century : స్టార్‌ బ్యాటర్ విరాట్ కోహ్లీ 101* (121 బంతుల్లో 10 ఫోర్లు) సెంచరీతో అదరగొట్టిన వేళ టీమ్​ ఇండియా 327 పరుగుల లక్ష్యాన్ని దక్షిణాఫ్రికా ముందుంచింది. విరాట్​ సెంచరీకి తోడు శ్రేయస్ అయ్యర్ హాఫ్ సెంచరీ, రోహిత్ శర్మ మెరుపులు మెరిపించడంతో.. టాస్ గెలిచి బ్యాటింగ్ ఎంచుకున్న భారత జట్టు.. నిర్ణీత 50 ఓవర్లలో 5 వికెట్లు కోల్పోయి 326 పరుగుల భారీ స్కోరు చేసింది.

కెప్టెన్ రోహిత్ శర్మ (40 పరుగులు, 24 బంతుల్లో, 6x4, 2x6) జట్టుకు మెరుపు ఆరంభాన్ని ఇచ్చాడు. వేగంగా ఆడే క్రమంలో 5.5 ఓవర్ వద్ద రబాడా బౌలింగ్​లో క్యాచౌట్​గా పెవిలియన్ చేరాడు రోహిత్. మరో ఓపెనర్ శుభ్​మన్ గిల్ (23 పరుగులు) కూడా త్వరగానే ఔటయ్యాడు. కేశవ్ మహరాజ్ క్లీన్ బౌల్డ్ చేశాడు. అయితే మొదటి 5 ఓవర్లలోనే 61 పరుగులు చేసింది భారత జట్టు. వన్డేల్లో టీమ్​ఇండియాకు మొదటి 5 ఓవర్లలో ఇదే అత్యధిక స్కోరు కావడం విశేషం.

ఇక స్టార్ బ్యాటర్ విరాట్(Kohli Century), శ్రేయస్ అయ్యర్(77 పరుగులు)​తో కలిసి స్కోర్ బోర్డును ముందుకు నడిపించాడు. వీరిద్దరు కలిసి 3 వికెట్​కు 137 పరుగుల భాగస్వామ్యం నెలకొల్పారు. 87 బంతుల్లో 7 ఫోర్లు, 2 సిక్సర్లతో 77 పరుగులు చేసిన అయ్యర్​.. 36వ ఓవర్​లో ఎంగ్డీ బౌలింగ్​లో ఔటయ్యాడు. ఇక తర్వాక వచ్చిన కేఎల్ రాహుల్.. 42.1 ఓవర్ వద్ద భారీ షాట్​కు ప్రయత్నించి క్యాచ్​ ఔటయ్యాడు. రాహుల్ ఔటయ్యాక క్రీజులోకి వచ్చిన సూర్యకుమార్ యాదవ్ ( 22 పరుగులు, 14 బంతుల్లో 5x4) వేగంగా అడే ప్రయత్నంలో ఎల్​బీడబ్ల్యూగా పెవిలియన్ చేరాడు. చివర్లో రవీంద్ర జడేజా (29 పరుగులు , 15 బంతుల్లో , 3x4, 1x6) అదరగొట్టాడు. ఇక సౌతాఫ్రికా బౌలర్లలో ఎంగ్డీ, రబాడా,మార్కో జాన్సన్, కేశవ్ మహరాజ్, షంసీ తలో వికెట్ దక్కించుకున్నారు.