రెండు దశాబ్దాల పాటు సాగిన తన క్రికెట్‌ ప్రస్థానానికి భారత మహిళా జట్టు సీనియర్‌ పేసర్‌ ఝులన్ గోస్వామి వీడ్కోలు పలకనున్న విషయం తెలిసిందే. ఇంగ్లాండ్‌తో ఆడనున్న మూడో వన్డే మ్యాచ్‌ ఆమెకు చివరిది కానుంది. ఈ తన సుదీర్ఘ ప్రయాణాన్ని గుర్తుచేసుకుంది. ఈ 20 ఏళ్లలో ఎన్నో ఎత్తు పల్లాలు చూశామని తెలిపింది. అయినా మహిళా క్రికెట్‌ రూపురేఖలు మార్చాలన్న లక్ష్యంతోనే ప్రతి ఒక్కరం పనిచేశామని, ఈరోజు ఆ కల సాకారమైందని పేర్కొంది. ఒకప్పుడు భారత మహిళా క్రికెట్‌ అసోసియేషన్‌గా మొదలైన జట్టు అంచెలంచెలుగా ఎదగడంపై ఆమె హర్షం వ్యక్తం చేసింది.
"1997లో ఈడెన్‌ గార్డెన్‌ వేదికగా జరిగిన మహిళల ప్రపంచ కప్‌ను తొలిసారి చూశా. దేశం కోసం ఆడాలన్న కల మొదటిసారి అక్కడే ఏర్పడింది. ఇంత సుదీర్ఘకాలం ఆడతానని మాత్రం నేనెప్పుడూ అనుకోలేదు. ఇది నాకు గొప్ప అనుభవం. ప్రతి క్షణాన్ని ఆస్వాదించాను. ఎంతో నేర్చుకున్నా. అండర్‌ 19 రోజుల నుంచి మిథాలీతో మంచి అనుబంధం ఉంది. మహిళా క్రికెట్‌ రూపురేఖలు మార్చగలమని మాకు విశ్వాసం ఉండేది. ఈరోజు అది చేసి చూపించాం. మహిళా క్రికెట్‌ అసోసియేషన్‌గా మొదలై ఈరోజు బీసీసీఐ ఆధ్వర్యంలో పనిచేసేంత ఎత్తుకు మా జట్టు ఎదగడం సంతోషంగా ఉంది. మొదటి సారి బౌలింగ్‌ చేయడం, కెప్టెన్‌ చేతుల మీదుగా మైడెన్‌ ఇండియా క్యాప్‌ను అందుకోవడం నాకెంతో అపురూపమైన క్షణాలు. ఇప్పటివరకు రెండు ప్రపంచకప్‌ ఫైనల్స్‌లో నేను ఆడాను. కానీ అందులో కనీసం ఒక్కటైనా గెలవలేకపోయామన్న అసంతృప్తి మాత్రం ఇప్పటికీ ఉంది. అయితే మహిళా జట్టు గ్రాఫ్‌ పెరిగింది. ఇప్పుడున్న అమ్మాయిలు దీనిని మరింత ముందుకు తీసుకువెళతారు" అని ధీమా వ్యక్తం చేసింది.