సౌథాంప్టన్ వేదికగా జరిగిన ప్రపంచ టెస్టు ఛాంపియన్షిప్ ఫైనల్లో కివీస్ ఘన విజయం సాధించింది. టీమ్ఇండియాపై 8 వికెట్ల తేడాతో కేన్ సేన విజయకేతనం ఎగురవేసింది. తద్వారా సుదీర్ఘ ఫార్మాట్లో విశ్వవిజేతగా న్యూజిలాండ్ నిలిచింది. కెప్టెన్ విలియమ్సన్ (89 బంతుల్లో 52 పరుగులు), టేలర్ (100 బంతుల్లో 47 పరుగులు) రాణించారు.
139 పరుగుల లక్ష్య చేధనలో న్యూజిలాండ్కు లాథమ్-కాన్వే ఓపెనర్ల జంట 33 పరుగుల భాగస్వామ్యం నెలకొల్పింది. ప్రమాదకరంగా మారుతున్న ఈ జోడీని స్పిన్నర్ అశ్విన్ విడగొట్టాడు. లాథమ్ (41 బంతుల్లో 9 పరుగులు)ను స్టంపౌట్గా వెనక్కి పంపి భారత్కు తొలి వికెట్ను అందించాడు. మరికాసేపటికే కాన్వే (47 బంతుల్లో 19 పరుగులు)ను కూడా అతడే వెనక్కి పంపాడు. ఈ లెఫ్ట్ హాండ్ బ్యాట్స్మన్ను వికెట్ల ముందు దొరకబుచ్చుకున్నాడు అశ్విన్. అనంతరం క్రీజులోకి వచ్చిన టేలర్.. విలియమ్సన్కు సహకరిస్తూనే మరోవైపు స్వేచ్ఛగా షాట్లు కొట్టాడు. మూడో వికెట్కు ఈ జంట 96 పరుగుల భాగస్వామ్యాన్ని నెలకొల్పి.. జట్టును విజయతీరాలకు చేర్చింది. కాగా, తొలి, రెండు ఇన్నింగ్స్ టీమ్ ఇండియా 217, 170 పరుగులు చేయగా.., కీవిస్ 249,140 పరుగులు చేసి డబ్ల్యూటీసీ విజేతగా నిలిచింది.
తేలిపోయిన బౌలర్లు..
ప్రతిష్ఠాత్మక ఈ మ్యాచ్లో భారత బౌలర్లు తేలిపోయారు. ఐదుగురిలో షమి, ఇషాంత్ మినహా మిగిలిన ముగ్గురు చెప్పుకోదగ్గ ప్రదర్శన చేయలేదు. పేస్కు సహకరిస్తున్న పిచ్పై ప్రత్యర్థి జట్టు నలుగురు పేసర్లను జట్టులోకి తీసుకుంది. తొలుత తీసుకున్న స్పిన్నర్ను పక్కనపెట్టింది. కానీ, భారత్ ఇందుకు విరుద్ధంగా ఇద్దరు స్పిన్నర్లను తుది జట్టులో ఆడించడం కూడా కలిసిరాలేదు. వీరి స్థానంలో ఉమేష్ యాదవ్ లేదా సిరాజ్ను బరిలోకి దింపి ఉంటే ఫలితం వేరేలా ఉండేదని పులువురు క్రీడా విశ్లేషకులు అంచనాలు వేస్తున్నారు.
చేతులేత్తేసిన బ్యాట్స్మెన్..
బ్యాటింగ్లోనూ టీమ్ఇండియా ఘోరంగా విఫలమైంది. బౌలింగ్కు అనుకూలిస్తున్న పిచ్పై రోహిత్ ఫర్వాలేదనిపించినా.. మరో ఓపెనర్ గిల్తో పాటు పుజారా, కెప్టెన్ కోహ్లీ, వైస్ కెప్టెన్ రహానె చెప్పుకోదగ్గ ప్రదర్శన చేయలేదు. స్పిన్ ద్వయం అశ్విన్-జడేజా ఇక బ్యాటింగ్లోనూ ఆకట్టుకోలేకపోయారు. జట్టు కష్టాల్లో ఉన్నప్పుడు అనవసరపు షాట్లకు పోయి వికెట్లు ఇచ్చుకున్నారు. ప్రత్యర్థి జట్టు చూపిన సహనం చూపి ఉంటే మ్యాచ్ను కనీసం డ్రాగానైనా ముగించేవారేమో. మొత్తానికి ఫలితమే రాదనుకున్న ఈ మ్యాచ్లో టీమ్ఇండియా చేజేతులా కివీస్కు టెస్ట్ ఛాంపియన్షిప్ హోదాను ఇచ్చేసింది!
ఇదీ చదవండి :'లంక టూర్లో ద్రవిడ్ చేయాల్సిందదే'
