బెంగళూరులో ఎంఎస్ ధోనీ క్రికెట్ అకాడమీ(Dhoni Cricket Academy) ప్రారంభమైంది. గేమ్ ప్లే, ఆర్కా స్పోర్ట్స్ సంస్థలు సంయుక్తంగా ఈ అకాడమీ ఏర్పాటు చేశాయి. బెంగళూరులోని బిదరహల్లిలో ఏర్పాటు చేసిన ఎంఎస్ ధోనీ అకాడమీలో ఇప్పటికే రిజిస్ట్రేషన్లు మొదలయ్యాయని నిర్వాహకులు పేర్కొన్నారు. నవంబర్ 7 నుంచి అకాడమీలో శిక్షణ ప్రారంభించనున్నారు. ఐపీఎల్ 2021 కోసం యూఏఈలో ఉన్న టీమ్ఇండియా మాజీ కెప్టెన్ ఎంఎస్ ధోనీ(Dhoni News).. అకాడమీ ప్రారంభం సందర్భంగా యువ క్రికెటర్లకు ఓ సందేశం పంపాడు.
"క్రికెట్ అకాడమీని ప్రారంభిస్తున్నందుకు సంతోషంగా ఉంది. యువ క్రికెటర్లకు 360 డిగ్రీలలో శిక్షణ ఇప్పించడమే గాక మంచి టెక్నిక్స్, టెక్నాలజీతో మీ నైపుణ్యాలకు మెరుగులుదిద్దడమే మా ప్రధాన ఉద్దేశం. సుశిక్షితులైన కోచింగ్ బృందం మీకు అన్నివిధాలుగా అత్యుత్తమ శిక్షణను అందిస్తుంది. వెంటనే రిజిస్టర్ చేసుకుని మా అకాడమీలో భాగస్వాములవ్వండి."