టీమ్ఇండియా యార్కర్ స్పెషలిస్ట్ జస్ప్రీత్ బుమ్రాను అభిమానులు విపరీతంగా ట్రోల్ చేస్తున్నారు. న్యూజిలాండ్తో జరిగిన డబ్ల్యూటీసీ ఫైనల్లో అత్యంత చెత్త ప్రదర్శన చేయడమే ఇందుకు కారణం.
ఇంగ్లాండ్తో సిరీస్కు ముందు టీమ్ఇండియా ఆటగాళ్లకు దాదాపు 20 రోజుల ఖాళీ సమయం ఉంది. అందులో భాగంగానే తన భార్య సంజనా గణేషన్తో కలిసి సరదాగా గడుపుతున్నాడు బుమ్రా. ఈ క్రమంలోనే ఇద్దరూ నవ్వుతున్న ఓ ఫొటోను తన ఇన్స్టాతో పాటు ట్విట్టర్ ఖాతాలో షేర్ చేశాడు జస్ప్రీత్. దీనిపై స్పందించిన ఫ్యాన్స్.. 'అలా ఎలా నవ్వుతున్నావు' అంటూ ప్రశ్నించారు. ప్రతిష్ఠాత్మక డబ్ల్యూటీసీ ఫైనల్లో ఒక్క వికెట్ కూడా తీయనందుకు బాధపడాలంటూ విమర్శిస్తున్నారు.
"డబ్ల్యూటీసీ ఫైనల్లో ఓడిన తర్వాత కూడా సంతోషంగా ఎలా ఉన్నావు? ఐసీసీ సెమీ ఫైనల్స్, ఫైనల్స్లో టీమ్ఇండియా ఆటగాళ్లు పదేపదే విఫలమవుతున్నారు. ఐపీఎల్లో మాత్రం 100 శాతం ప్రదర్శన చేస్తున్నారు. అదే ఇండియాకు ఆడేటప్పుడు అందులో 30 శాతం ప్రయత్నం కూడా చేయరు. ఇందుకు మీకు బాధగా లేదా?" అని ఓ అభిమాని ట్విట్టర్ వేదికగా బుమ్రాను ప్రశ్నించాడు.
సౌథాంప్టన్ వేదికగా జరిగిన డబ్ల్యూటీసీ ఫైనల్లో పేసర్లకు సహకరిస్తున్న పిచ్పై బుమ్రా ఒక్క వికెట్ కూడా తీయలేకపోయాడు. ఈ మ్యాచ్లో న్యూజిలాండ్ 8 వికెట్ల తేడాతో విజయం సాధించింది. కాగా, ప్రస్తుతం యూకే టూర్లో ఉన్న టీమ్ఇండియా ఆగస్టు 4 నుంచి ఇంగ్లాండ్తో టెస్ట్ సిరీస్ ఆడనుంది.
ఇదీ చదవండి:అందమైన బొమ్మ.. ఈ టీమ్ఇండియా ముద్దుగుమ్మ
