Ishan Kishan About Dhoni: ఒకసారి మ్యాచ్‌ జరుగుతున్నప్పుడు ఫీల్డింగ్ సెట్‌ చేసే క్రమంలో ధోనీ చేసిన సైగలు తనకు అర్థంకాలేదని ముంబయి ఓపెనర్‌ ఇషాన్ కిషన్ చెప్పాడు. అప్పుడు తనకు ఎక్కడికి వెళ్లాలో అర్థంకాలేదన్నాడు. తాజాగా 'బ్రేక్‌ఫాస్ట్‌ విత్‌ ఛాంపియన్స్‌' అనే యూట్యూబ్ ఛానల్లో మాట్లాడిన ఇషాన్.. ధోనీతో తనకు ఎదురైన ఈ ఆసక్తికర విషయం వెల్లడించాడు.
'ఒకసారి నేను విజయ్‌హజారే ట్రోఫీ ఆడుతున్నప్పుడు ధోనీ జట్టులో ఉన్నా. అప్పుడు నేను థర్డ్‌మ్యాన్‌ దిశలో ఫీల్డింగ్ చేస్తుండగా మహీ గాల్లో చేతులు ఊపుతూ ఫీల్డర్లను అటు, ఇటు మారమన్నాడు. దాంతో నాకేం అర్థం కాలేదు. పక్కనున్న ఫీల్డర్‌ని.. ధోనీని అడిగి నేను ఎక్కడికి వెళ్లాలో చెప్పమని అడిగాను. మళ్లీ మహీభాయ్‌ అలాగే చేతులు ఊపి సైగలు చేశాడు. అప్పుడు నేను ఎక్కడికి వెళ్లాలో అర్థంకాక తికమక పడ్డాను' అని నాటి సరదా ఘటనను గుర్తుచేసుకున్నాడు.