Ishan Kishan Mental Health :సౌతాఫ్రికాతో టెస్టు సిరీస్ నుంచి టీమ్ఇండియా యంగ్ బ్యాటర్ ఇషాన్ కిషన్ తప్పుకోవడంపై బీసీసీఐ క్లారిటీ ఇచ్చింది. 'ఇషాన్ కిషన్ తనకు విరామం కావాల్సిందిగా మమ్మల్ని కోరాడు. ఏడాది కాలంగా నిర్విరామంగా వివిధ సిరీస్లు, టోర్నీల్లో ఆడుతున్న కారణంగా మానసికంగా అలసిపోయినట్లు తెలిపాడు. అందుకే సఫారీలతో జరగనున్న టెస్టు సిరీస్లో అతడి విన్నపం మేరకు విశ్రాంతినిచ్చాం' అని బీసీసీఐ వర్గాలు తెలిపాయి.
అయితే ఈ ఏడాది ప్రారంభం నుంచి విరామం లేకుండా జట్టుతో ట్రావెల్ చేస్తున్నందున ఇషాన్ మానసికంగా అలసిపోయాడు. ఇటీవల జట్టు మేనేజ్మెంట్ను కలిసి తన మానసిక పరిస్థితి వివరించాడు. దీంతో కొంతకాలం తనకు క్రికెట్ నుంచి రెస్ట్ ఇవ్వాల్సిందిగా బీసీసీఐను కోరగా, మేనేజ్మెంట్ అంగీకరించింది. ఇక ఇషాన్ స్థానాన్ని కేఎస్ భరత్తో భర్తీ చేయనున్నట్లు బీసీసీఐ ఇదివరకే ప్రకటించింది.
కాగా, ఈ ఏడాది ప్రారంభంలో ఇషాన్ కిషన్ బోర్డర్ గావస్కర్ ట్రోఫీలో ఆడాడు. ఆపై ఐపీఎల్లో ఆడిన ఇషాన్, తర్వాత జూన్లో డబ్ల్యూటీసీ ఫైనల్ కోసం ఇంగ్లాండ్ వెళ్లాడు. ఆ తర్వాత ఆసియా కప్, వన్డే ప్రపంచకప్ లాంటి ప్రతిష్ఠాత్మక ఈవెంట్లలో టీమ్ఇండియా తరఫున ప్రాతినిధ్యం వహించాడు. గత నెల స్వదేశంలో అస్ట్రేలియాతో జరిగిన టీ20 సిరీస్లోనూ పాల్గొన్నాడు ఇషాన్.