భారత స్టార్ బ్యాటర్ విరాట్ కోహ్లీకి ఏప్రిల్ 23తో ఉన్న సెంటిమెంట్ కొనసాగుతూనే ఉంది. తాజాగా ఆర్ఆర్తో జరిగిన మ్యాచ్లోనూ బ్యాటర్గా విఫలమయ్యాడు. ఇన్నింగ్స్లో తాను ఎదుర్కొన్న తొలి బంతికే డకౌట్గా వెనుదిరిగాడు. బౌల్ట్ వేసిన బంతిని అంచనా వేయలేక వికెట్ల ముందు దొరికిపోయాడు. కానీ ఇదే మ్యాచ్లో తన పేరిట మరో రికార్డు సొంతం చేసుకున్నాడు విరాట్. ఐపీఎల్లో వందకుపైగా క్యాచ్లను అందుకున్న మూడో ఫీల్డర్గా రికార్డు సృష్టించాడు. విల్లే బౌలింగ్లో దేవ్‌దత్‌ పడిక్కల్ ఇచ్చిన క్యాచ్ను విరాట్ అందుకున్నాడు. దీంతో ఐపీఎల్ చరిత్రలో 100 క్యాచ్లను అందుకున్న ప్లేయర్ల జాబితాలో చేరాడు.
అయితే విరాట్ కంటే ముందు సురేశ్ రైనా, కీరన్ పోలార్డ్ ఈ ఫీట్ సాధించారు. రైనా 205 మ్యాచ్ల్లో 109 క్యాచ్లతో మొదటి స్థానంలో ఉన్నాడు. తర్వాత వెస్టిండీస్ స్టార్ ప్లేయర్ కీరన్ పోలార్డ్ 189 మ్యాచ్ల్లో 103 క్యాచ్‌లు పట్టాడు. వీరిద్దరి తర్వాత ఐపీఎల్లో వందకుపైగా క్యాచ్లను అందుకున్న మూడో ఫీల్డర్గా కోహ్లీ నిలిచాడు. రోహిత్ శర్మ 98, శిఖర్‌ ధవన్‌ 93 క్యాచ్లతో వరుసగా నాలుగు, ఐదు స్థానాల్లో ఉన్నారు.
గాలిలో భార్య అనుష్కకు ముద్దిస్తూ...
ఐపీఎల్తో పాటు టీమ్ఇండియా మ్యాచ్లకు హాజరవుతుంటారు విరాట్ సతీమణి అనుష్క శర్మ. ఆదివారం రాజస్థాన్తో మ్యాచ్లో కూడా చిన్నస్వామి స్టేడియంలో అనుష్క సందడి చేశారు. ఛేదనలో బెంగళూరు బౌలర్లను ధాటిగా ఎదుర్కొంటూ యశస్వి జైస్వాల్(47), దేవదుత్‌ పడిక్కల్ (52) రాజస్థాన్ను విజయం వైపు నడిపించారు. ఈ క్రమంలో హర్షల్‌ పటేల్‌ బౌలింగ్లో యశస్వి ఇచ్చిన క్యాచ్ను విరాట్ బౌండరీ లైన్‌ వద్ద అందుకున్నాడు. అనంతరం గ్యాలరీలో నుంచి మ్యాచ్ను వీక్షిస్తున్న తన భార్య అనుష్క వైపు చూస్తూ ఫ్లయింగ్‌ కిస్ ఇచ్చాడు. ఆ వీడియో ఇప్పుడు నెట్టింట వైరల్గా మారింది. అనుష్క కూడా నవ్వులు చిందిస్తూ ఆర్సీబీ జట్టు ఆటగాళ్లను ఉత్సాహపరిచింది. కాగా ఈ మ్యాచ్లో ఆర్సీబీ ఏడు పరుగుల తేడాతో గెలిచింది.
ముందునుంచి అనుకున్నట్లే
విరాట్‌కు ఏప్రిల్ 23వ తేదీ అంతగా అచ్చొచ్చినట్లు లేదు. ఇంతకు ముందు ఇదే తేదీన ఆడిన రెండు మ్యాచ్ల్లో కోహ్లీ డకౌట్గా పెవిలియన్‌కు చేరాడు. 2017లో కోల్‌కతాతో, 2022 సీజన్లో హైదరాబాద్ మీద కూడా విరాట్ డకౌటయ్యాడు. 2017లో కోల్‌కతాతో జరిగిన మ్యాచ్లో బెంగళూరు జట్టు కేవలం 49 పరుగులకే ఆలౌటై చెత్త రికార్డును తన ఖాతాలో వేసుకుంది. 9 పరుగులు చేసిన జాదవ్యే ఆ మ్యాచ్లో టార్ స్కోరర్.
100 వికెట్ల క్లబ్లో ట్రెంట్ బౌల్ట్...
కివీస్ ఆటగాడు ట్రెంట్ బౌల్డ్.. విరాట్ వికెట్తో ఐపీఎల్లో వంద వికెట్ల క్లబ్లో చేరాడు. 84 మ్యాచ్ల్లో అతడు ఈ ఘనత అందుకున్నాడు.
