ఎలాన్ మస్క్​పై ఆర్సీబీ షాకింగ్ కామెంట్స్.. ఏం జరిగిందంటే?

టెస్లా వ్యవస్థాపకుడు ఎలాన్​ మస్క్​పై ఐపీఎల్ ఫ్రాంఛైజీ ఆర్సీబీ ట్విట్టర్​ ఖాతా నుంచి సంచలన ట్వీట్​ వచ్చింది. సబ్సిడీ ద్వారా పొందిన డబ్బును బిట్​కాయిన్​లో పెట్టుబడి పెట్టారంటూ ఆ ట్వీట్​లో ఆరోపించింది. ఈ ట్వీట్​ ప్రస్తుతం వైరల్​గా మారింది.

టెస్లా, స్పేస్‌ ఎక్స్‌ వ్యవస్థాపకుడు ఎలాన్‌ మస్క్‌ను విమర్శిస్తున్నట్లు ఐపీఎల్​ ఫ్రాంఛైజీ రాయల్​ ఛాలెంజర్స్​ బెంగళూరు ట్విట్టర్​ ఖాతా నుంచి ఓ ట్వీట్​ ప్రత్యక్షమయ్యింది. ఇప్పుడా ట్వీట్​ నెట్టింట వైరల్​గా మారింది. ఆదివారం ఎలాన్​ మస్క్​ తాను పెంచుకుంటున్న కొత్త కుక్కపిల్లను పరిచయం చేస్తూ చేసిన ట్వీట్​కు.. ఆర్సీబీ ఖాతాతో విమర్శిస్తూ కామెంట్​ వచ్చింది. "ఫ్లోకి వచ్చేసింది" అంటూ తన కుక్కపిల్ల ఫొటోను ట్విట్టర్​లో పోస్ట్ చేశారు మస్క్. దీనిపై ఆర్సీబీ ఈ విధంగా స్పందించింది.

"2020లో టెస్లా ద్వారా పర్యావరణ పరిరక్షణ పేరుతో దాదాపుగా రూ.11.05 వేల కోట్ల(1.5 బిలియన్​ డాలర్లు) సబ్సీడీని పొందిన మస్క్.. ఇప్పుడదే మొత్తాన్ని బిట్​కాయిన్​పై పెట్టుబడి పెట్టారు" అంటూ ఆర్సీబీ ఖాతా నుంచి కామెంట్​ వచ్చింది. అలా చేసిన వెంటనే సోషల్​మీడియాలో ఆ ట్వీట్​ వైరల్​గా మారింది.

ఆర్సీబీ కామెంట్​

దీనిపై స్పందించిన రాయల్​ ఛాలెంజర్స్​ బెంగుళూరు ఫ్రాంఛైజీ.. జట్టుకు సంబంధించిన అధికారిక ఖాతా హ్యాక్​ అయిందని ఆరోపించింది. వెంటనే దానికి సంబంధించిన కామెంట్​నూ తొలగించింది. మస్క్​ను ఉద్దేశించి చేసిన కామెంట్​ను తాము ఖండిస్తున్నట్లు తెలిపింది. ఆ తర్వాత వెంటనే తమ ఖాతాను ఫ్రాంఛైజీ అధీనంలోకి తీసుకున్నట్లు వెల్లడించింది.

ఇదీ చూడండి..అప్పటి పరిస్థితిని తలచుకొని మస్క్ కంటతడి!