జూలు విదిల్చిన 'బేబీ ఏబీ'.. ఈ ఐపీఎల్​లోనే భారీ సిక్స్​.. వీడియో వైరల్​

Dewald brevis IPL 2022: ఐపీఎల్​ 2022లో పంజాబ్​ కింగ్స్​తో జరిగిన మ్యాచ్​లో భారీ సిక్సర్లతో అందరి దృష్టిని ఆకర్షించాడు ముంబయి ఇండియన్స్​ యువ ఆటగాడు, జూనియర్​ ఏబీ.. డెవాల్డ్​ బ్రెవిస్​. ఈ సీజన్​లోనే లాంగెస్ట్​ సిక్సర్​ బాది ఔరా అనిపించాడు.

Dewald brevis IPL 2022: ఐపీఎల్​ మెగా లీగ్​ 15వ సీజన్​లో సిక్సర్లు, ఫోర్ల మోత మోగిపోతోంది. ఒకరిని మించి ఒకరు తగ్గేదేలే అంటూ బంతిని బౌండరీ దాటిస్తున్నారు. పంజాబ్​ కింగ్స్​తో బుధవారం జరిగిన మ్యాచ్​లో ముంబయి ఇండియన్స్​ యువ ఆటగాడు జూనియర్​​ 'ఏబీ' డెవాల్డ్​ బ్రెవిస్​ జూలు విదిల్చాడు. భారీ సిక్సర్లతో పంజాబ్​ బౌలర్లకు చుక్కలు చూపించాడు. ఇన్నింగ్స్​ 9వ ఓవర్​ వేసిన రాహుల్​ చాహర్​ను ఉతికారేశాడు. వరుసగా ఓ ఫోర్​, నాలుగు సిక్సులతో ఏకంగా 28 పరుగులు రాబట్టాడు.

అదే ఓవర్ ఆఖరి బంతికి బ్రెవిస్​ బాదిన ఓ సిక్సర్​.. 112 మీటర్ల దూరం వెళ్లింది. దీంతో ఐపీఎల్​ 2022లోనే లాంగెస్ట్​ సిక్సర్​ కొట్టిన ఆటగాడిగా రికార్డు​ సృష్టించాడు. జూనియర్​ ఏబీ కొట్టిన భారీ సిక్సర్​ వీడియో ప్రస్తుతం సామాజిక మాధ్యమాల్లో వైరల్​గా మారింది. ఇప్పటివరకు పంజాబ్​ బ్యాటర్​ లివింగ్​ స్టోన్​ కొట్టిన 108 మీటర్ల సిక్సర్ లాంగెస్ట్​గా ఉండేది.

ఈ మ్యాచ్​లో 196 స్ట్రైక్​ రేట్​తో 25 బంతుల్లోనే నాలుగు ఫోర్లు, ఐదు సిక్సర్లతో 49 పరుగులు సాధించిన బ్రెవిస్​.. త్రుటిలో ఐపీఎల్​ తొలి అర్ధశతకం చేజార్చుకున్నాడు. ఒడియన్​ స్మిత్​ బౌలింగ్​లో అర్ష్​దీప్​ సింగ్​కు క్యాచ్​ ఇచ్చి వెనుదిరిగాడు. ఐపీఎల్​లో ఎలాంటి అనుభవం లేని జూనియర్​ ఏబీ భారీ సిక్సర్లతో విరుచుకుపడటంపై సీనియర్లు ప్రశంసలు కురిపించారు. అయితే.. ఈ మ్యాచ్​లో ముంబయి ఇండియన్స్​ 12 పరుగుల తేడాతో ఓడిపోయింది. 199 పరుగుల లక్ష్య ఛేదనలో 186కే పరిమితమై.. ఐపీఎల్​ 2022లో వరుసగా ఐదో ఓటమిని నమోదు చేసింది.

ఇదీ చూడండి:IPL 2022: ఐదు సార్లు ఛాంపియన్​కు ఐదో ఓటమి..