IPL 2023 Playoffs : ఇండియన్ ప్రీమియర్ లీగ్ 16వ సీజన్లో ఇప్పటివరకు గుజరాత్ టైటాన్స్ తప్ప ఏ జట్టు కూడా ఫ్లే ఆఫ్స్కు అర్హత సాధించలేదు. ఈ రేసులో చెన్నై, లఖ్నవూ ముందంజలో ఉండగా.. ముంబయి, బెంగళూరు, రాజస్థాన్, పంజాబ్, కోల్కతా జట్లకు ఇంకా అవకాశాలు ఉన్నాయి. దిల్లీ, హైదరాబాద్ జట్లు ఇప్పటికే ఇంటి బాట పట్టాయి. చెన్నై, లఖ్నవూ, ముంబయి, రాజస్థాన్, కోల్కతా తలా ఒక మ్యాచ్ ఆడాల్సి ఉండగా.. మిగిలిన బెంగళూరు, పంజాబ్ రెండేసి మ్యాచ్లు ఆడాలి.
మరోవైపు హైదరాబాద్ ఈ సీజన్లో మరో రెండు మ్యాచ్లు ఆడాల్సి ఉంది. ఆరెంజ్ ఆర్మీ తదుపరి రెండు మ్యాచ్ల్లో ముంబయి, బెంగళూరు జట్లతో తలపడనుంది. అయితే ఈ మ్యాచ్లు ఎస్ఆర్హెచ్కు నామమాత్రమే అయినా.. వీటి ఫలితాలు ఇరు జట్లపై ప్రభావం చూపనున్నాయి. ఇప్పటికే టోర్నీ నుంచి నిష్క్రమించిన ఎస్ఆర్హెచ్.. ఆఖరి రెండు మ్యాచ్ల్లో అద్భుతాలు చేసి ఇరు జట్ల ఆశలను ఆవిరి చేస్తే అంతే సంగతి.
తాజాగా లఖ్నవూతో ఓటమి చవిచూసిన ముంబయికి ఫ్లే అఫ్స్ అవకాశాలు సన్నగిల్లగా.. మరోవైపు బెంగళూరు జట్టుకు షాక్లు ఇవ్వటం హైదరాబాద్కు కొత్తేమీ కాదు. బుధవారం.. ఉప్పల్ వేదికగా జరిగే మ్యాచ్లో సన్రైజర్స్ గెలిస్తే బెంగళూరు పరిస్థితి ఏంటా అని ఆర్సీబీ జట్టు అభిమానులు కలవరపడుతున్నారు. కాగా ముంబయి తన ఆఖరి మ్యాచ్లో హైదరాబాద్ చేతిలో ఓడితే టోర్నీ నుంచి నిష్క్రమించాల్సిందే. అందువల్ల సన్రైజర్స్తో మ్యాచ్లు ఈ జట్లకు చాలా కీలకం కానున్నాయి.
టాప్ రెండులో ఉన్న జట్లు క్వాలిఫైయర్ - 1, మూడు, నాలుగు స్థానాల్లో ఉన్న జట్లు ఎలిమినేటర్ మ్యాచ్ ఆడతాయి. క్వాలిఫైయర్ - 1లో గెలిచిన జట్టు నేరుగా ఫైనల్స్కు వెళ్లగా.. ఎలిమినేటర్ మ్యాచ్లో గెలిచిన జట్టు, క్వాలిఫైయర్ - 1లో ఓడిన జట్టుతో క్వాలిఫైయర్ - 2 లో తలపడతాయి. ఇందులో గెలిచిన జట్టు ఫైనల్స్ చేరుతుంది. అంటే టాప్ 2లో ఉన్న జట్టుకు ఫైనల్స్ చేరేందుకు రెండు అవకాశాలు ఉంటాయి. అందుకే ఏ జట్టు అయినా మొదటి రెండు స్థానాల్లో ఉండేందుకు ప్రయత్నిస్తాయి.
ఇక సీజన్ ఆరంభంలో చతికిలపడ్డ ముంబయి క్రమంగా పుంజుకొంది. ఈ సీజన్లో ఏకంగా మూడు సార్లు 200 పై చిలుకు టార్గెట్లను ఛేదించి ప్లే ఆఫ్స్ రేసులోకి దూసుకొచ్చింది. కానీ మంగళవారం రాత్రి లఖ్నవూతో జరిగిన మ్యాచ్లో ఓడి అవకాశాలను మరింత కష్టతరం చేసుకుంది. తమ ఆఖరి మ్యాచ్లో హైదరాబాద్పై గెలిస్తేనే ముంబయి టోర్నీలో నిలుస్తుంది.
