ఇండియన్ ప్రీమియర్ లీగ్ 16వ సీజన్లో భాగంగా.. ముంబయి, కోల్కతా జట్ల మధ్య మ్యాచ్ ప్రారంభమైంది. అందులో భాగంగా ముంబయి టాస్ గెలిచి.. బౌలింగ్ ఎంచుకుంది. ప్రత్యర్థి కోల్కతాకు బ్యాటింగ్ అప్పగించింది.
కోల్కతా నైట్ రైడర్స్ తుది జట్టు: రహ్మానుల్లా గుర్బాజ్ (వికెట్ కీపర్), వెంకటేశ్ అయ్యర్, ఎన్ జగదీశన్, నితీశ్ రాణా(కెప్టెన్), రింకూ సింగ్, ఆండ్రూ రస్సెల్, సునీల్ నరైన్, శార్దూల్ ఠాకూర్, ఉమేశ్ యాదవ్, లాకీ ఫెర్గూసన్, వరుణ్ చక్రవర్తి
ముంబయి ఇండియన్స్ తుది జట్టు: ఇషాన్ కిషన్(వికెట్ కీపర్), కామెరూన్ గ్రీన్, తిలక్ వర్మ, సూర్యకుమార్ యాదవ్(కెప్టెన్), టిమ్ డేవిడ్, నెహాల్ వధేరా, అర్జున్ తెందూల్కర్, హృతిక్ షోకీన్, పీయూష్ చావ్లా, డువాన్ జాన్సెన్, రిలే మెరెడిత్
మ్యాచ్ గెస్టులుగా 19 వేల మంది అమ్మాయిలు..
ఈ మ్యాచ్లో ముంబయి ఇండియన్స్ ప్రత్యేక జెర్సీలో కనిపిస్తుంది. మహిళల ప్రీమియర్ లీగ్ (WPL) ముంబయి ఇండియన్స్ జెర్సీని.. ఆ ఫ్రాంచైజీ పురుషుల జట్టు ధరించింది. ఈ మేరకు ముంబయి జట్టు తమ వెబ్సైట్లో పేర్కొంది. ఈఎస్ఏ (ఎడ్యుకేషన్ అండ్ స్పోర్ట్స్ ఫర్ ఆల్) దినోత్సవాన్ని పురస్కరించుకుని నగరంలోని వివిధ ఎన్జీఓలకు చెందిన 19 వేల మంది అమ్మాయిలకు ఫ్రీ పాస్లు ఇచ్చింది ముంబయి ఫ్రాంచైజీ. ఈ మేరకు ఫ్రాంచైజీ యజమాని నీతా అంబానీ నిర్ణయం తీసుకున్నారు.
అర్జున్ తెందుల్కర్ అరంగేట్రం..
అర్జున్ తెందుల్కర్ ఈ మ్యాచ్‌తో ఐపీఎల్లో అరంగేట్రం చేశాడు. రోహిత్ శర్మ చేతుల మీదుగా ముంబయి ఇండియన్స్ జట్టు క్యాప్ అందుకున్నాడు అర్జున్. కోల్కతా ఇన్నింగ్స్లో మొదటి ఓవర్ను వేశాడు. లెఫ్ట్ ఆర్మ్ పేసర్ అయిన అర్జున్ను ముంబయి జట్టు.. రూ. 30 లక్షల బేస్ ప్రైస్కు కొనుగోలు చేసింది. అంతకుముందు 2021లో ఇదే జట్టు రూ. 20 లక్షల బేస్ ప్రైస్కు కొనుగోలు చేసింది. గాయం కారణంగా అతడిని జట్టు నంచి తొలగించింది. అర్జున్ మొదట ముంబయి తరఫున రంజీ ట్రోఫీ ఆడాడు.
ఐపీఎల్లో ముంబయి, కోల్కతా జట్లు ఇప్పటి వరకు ఇరుజట్లు 31 సార్లు తలపడ్డాయి. అందులో 22 మ్యాచ్‌ల్లో ముంబయి ఇండియన్స్ విజయం సాధించింది. ఈ సీజన్లో కోల్కతా నైట్ రైడర్స్ జట్టు కూడా గట్టి పోటీనిస్తూ 4 విజయాలతో పాయింట్ల పట్టికలో ముంబయి (9) కంటే మెరుగ్గా ఐదో స్థానంలో ఉంది.
రోహిత్ దూరం..
ఈ మ్యాచ్లో ముంబయి ఇండియన్స్ జట్టు కెప్టెన్ రోహిత్ శర్మ ఆడటం లేదు. అస్వస్థతకు గురైన కారణంగా మ్యాచ్కు దూరంగా ఉన్నాడు. రోహిత్ స్థానంలో సూర్య కుమార్ యాదవ్ జట్టును నడిపించనున్నాడు.
