No Ball controversy: దిల్లీ కెప్టెన్ రిషభ్ పంత్, ఆ జట్టు సహాయక కోచ్ ప్రవీణ్ ఆమ్రే తీరుపై ఇంగ్లాండ్ మాజీ కెప్టెన్ కెవిన్‌ పీటర్సన్ ఆగ్రహం వ్యక్తం చేశాడు. అసలు మీరేం అనుకుంటున్నారని చిందులు తొక్కాడు. గతరాత్రి రాజస్థాన్ నిర్దేశించిన 223 పరుగుల భారీ లక్ష్య ఛేదనలో దిల్లీకి చివరి ఓవర్‌లో 36 పరుగులు అవసరమయ్యాయి. ఆ సమయంలో రోమన్‌ పావెల్‌ (36; 15 బంతుల్లో 5x6) తొలి 3 బంతుల్ని 3 సిక్సర్లుగా మలిచి మ్యాచ్‌ను ఉత్కంఠభరితంగా మార్చేశాడు. అయితే, మూడో బంతి అతడి నడుముపైకి రావడంతో అది నోబాల్‌లా కనిపించింది. దీనిపై పావెల్‌ ఫీల్డ్‌ అంపైర్లను నిర్ధారించుకోవాలని అడిగినా వాళ్లు థర్డ్‌ అంపైర్‌కు నివేదించలేదు. దీంతో కాసేపు మైదానంలో ఉద్రిక్తత చోటుచేసుకుంది.
అందుకు నిరసనగా దిల్లీ కెప్టెన్ పంత్.. తమ బ్యాట్స్‌మెన్‌ను మైదానం వీడి బయటకు రావాలని పిలిచాడు. వెంటనే సహాయ కోచ్ ఆమ్రె కలగజేసుకొని మైదానంలోకి వెళ్లి అంపైర్లతో మాట్లాడాడు. తర్వాత పరిస్థితులు సద్దుమణగడం వల్ల మ్యాచ్ జరిగింది. చివరికి దిల్లీ 207/8తో నిలిచి 15 పరుగుల తేడాతో ఓటమిపాలైంది. ఈ నేపథ్యంలోనే పంత్, ఆమ్రె తీరును పీటర్సన్ తప్పుబట్టాడు. ఆటలో అప్పుడప్పుడు పొరపాట్లు జరుగుతాయని, అంతమాత్రానా ఇలా స్పందించడం తగదని అన్నాడు. దిల్లీ జట్టు ఇలా చేయడం క్రికెట్‌కు మంచిది కాదన్నాడు.