'విలియమ్సన్​కు ఇంకా సమయం పడుతుంది'

తమ తొలి మ్యాచ్​లో సన్​రైజర్స్​ ఆటగాడు కేన్​ విలియమ్సన్​ బరిలోకి దిగకపోవడంపై స్పందించాడు ఆ జట్టు కోచ్​ ట్రెవర్​ బేలిస్​. మ్యాచ్​ ఫిట్​నెస్​ సాధించడానికి అతడికి మరికొంత సమయం అవసరమని తెలిపాడు. నెట్స్​లో సాధన చేయాల్సిన అవసరముందని పేర్కొన్నాడు.

కోల్​కతాతో మ్యాచ్​లో హైదరాబాద్​ ఆటగాడు కేన్​ విలియమ్సన్​ బరిలోకి దిగకపోవడంపై ఆ జట్టు​ కోచ్​ ట్రెవర్ బే​లిస్​ స్పందించాడు. కేన్​ ఫిట్​నెస్​ సాధించడానికి మరికొంత సమయం అవసరమని స్పష్టం చేశాడు.

"మ్యాచ్​ ఫిట్​నెస్​ సాధించడానికి కేన్​కు మరికొంత సమయం పడుతుందని మేము భావిస్తున్నాము. మరికొంత నెట్ సాధన చేయాల్సిన అవసరముంది. జానీ బెయిర్​ స్టో స్థానంలో విలియమ్సన్​ బ్యాటింగ్​ చేయాల్సి ఉంది. కానీ, మేము దాని గురించి అంతగా బాధ పడట్లేదు. ఎందుకంటే బెయిర్​ స్టో ఇటీవల భారత్​తో సిరీస్​ సందర్భంగా పరిమిత ఓవర్ల క్రికెట్​లో ఫామ్​ అందిపుచ్చుకున్నాడు. నంబర్​ 4లో అతడు స్థిరంగా రాణించాడు. త్వరలోనే కేన్​ తుది జట్టులోకి వస్తాడు."

-ట్రెవర్​ బేలిస్​, సన్​రైజర్స్​ కోచ్​.

బ్యాటింగ్​ ఆర్డర్​లో సమద్​ కంటే ముందు విజయ్​ శంకర్​ను పంపడంపై బేలిస్ స్పందించాడు. ప్రాక్టీస్​ మ్యాచ్​లలో శంకర్​.. బంతిని బలంగా బాదాడని తెలిపాడు. ఓ మ్యాచ్​లో ఏకంగా 95 పరుగులు చేశాడని పేర్కొన్నాడు. విజయ్​ తమ అత్యుత్తమ ప్లేయర్​ అని అభిప్రాయపడ్డాడు. చాలా బంతులను స్టాండ్స్​లోకి పంపాడని.. అందుకే అతడిని ముందు పంపామని ఎస్​ఆర్​హెచ్​ కోచ్​ వెల్లడించాడు.

ఇదీ చదవండి:అంబుడ్స్‌మన్‌గా దీపక్.. మాట నెగ్గించుకున్న అజహర్

ప్రతిభ ఉన్నప్పటికీ.. గతేడాది సమద్ చెప్పుకోదగ్గ ప్రదర్శన చేయలేదని బేలిస్​ తెలిపాడు. అతడికి అనుభవం వచ్చే కొద్దీ అవకాశాలు ఎక్కువగా వస్తాయని పేర్కొన్నాడు. ​

చెన్నైలోని ఎంఏ చిదంబరం స్టేడియం వేదికగా ఆదివారం జరిగిన మ్యాచ్​లో కేకేఆర్​ 10 పరుగుల తేడాతో విజయం సాధించింది. నితీశ్​ రానా, రాహుల్​ త్రిపాఠి అర్ధ సెంచరీలతో రాణించారు. లక్ష్య ఛేదనలో ఎస్​ఆర్​హెచ్​ పోరాడినప్పటికీ ఫలితం దక్కలేదు.

ఇదీ చదవండి:నా ఫామ్ వెనుక కారణం అదే: పృథ్వీ షా