ఐపీఎల్(IPl 2021 news)లో విజయవంతమైన జట్లలో చెన్నై సూపర్ కింగ్స్ ఒకటి. ముంబయి ఇండియన్స్‌ తర్వాత అత్యధిక టైటిళ్లు సాధించిన జట్టుగా ధోనీసేనకు ప్రత్యేక గుర్తింపు ఉంది. అయితే, గతేడాది పేలవ ఆటతీరుతో కనీసం ప్లేఆఫ్స్ చేరకుండా ఐపీఎల్(IPl 2021 news) చరిత్రలో తొలిసారి ఇంటిముఖం పట్టిన ఆ జట్టు ఈసారి విజృంభించి ఆడింది. దిల్లీతో సమానంగా విజయాలు సాధిస్తూ ప్లేఆఫ్స్(ipl playoffs teams 2021) బెర్తునూ ముందే ఖరారు చేసుకుంది. కానీ, ఇప్పుడు వరుసగా మూడు ఓటములు చవిచూసి అనూహ్యంగా కంగుతింది. ఆదివారం దిల్లీతో క్వాలిఫయర్-1(csk vs dc 2021)లో తలపడుతున్న నేపథ్యంలో ధోనీసేన ప్రస్తుత పరిస్థితులు ఎలా ఉన్నాయో చూద్దామా..
ఆ ఓటములకు కారణాలేంటి?
చెన్నై గురువారం రాత్రి తన చివరి లీగ్ మ్యాచ్లో పంజాబ్(csk vs pbks 2021)తో తలపడింది. దుబాయ్‌ వేదికగా జరిగిన ఈ మ్యాచ్లో తొలుత బ్యాటింగ్ చేసిన ఆ జట్టు 134/6 స్కోరే చేసింది. డుప్లెసిస్‌ (76; 55బంతుల్లో) ధాటిగా ఆడినా మిగతా బ్యాట్స్‌మెన్‌ తేలిపోయారు. ఛేదనలో పంజాబ్ కెప్టెన్‌ కేఎల్‌ రాహుల్‌ (98*; 42 బంతుల్లో ) ఆకాశమే హద్దుగా చెలరేగిపోయాడు. అతడు ఒంటి చేత్తో మ్యాచ్‌ను 13 ఓవర్లలోనే పూర్తి చేశాడు. దీంతో ఈ పిచ్‌ పెద్ద ప్రమాదకరమేమీ కాదని తెలుస్తోంది. బ్యాట్స్‌మెన్‌ వైఫల్యమే చెన్నై ఓటమికి ప్రధాన కారణమని స్పష్టంగా అర్థమవుతోంది.
అంతకుముందు దిల్లీ క్యాపిటల్స్తో(dc vs csk 2021)నూ ఇదే మైదానంలో చెన్నై తొలుత బ్యాటింగ్ చేసి 136/5 స్వల్ప స్కోరే నమోదు చేసింది. ఈసారి అంబటి రాయుడు (55*; 43 బంతుల్లో) ఆదుకున్నాడు. అనంతరం దిల్లీ ఛేదనలో తడబాటుకు గురైంది. 19.4 ఓవర్లలో ఏడు వికెట్లు కోల్పోయి లక్ష్యాన్ని చేరుకుంది. ఇక ఈ మ్యాచ్‌కు ముందు అబుదాబి వేదికగా రాజస్థాన్‌(csk vs rr 2021)తో జరిగిన పోరులోనూ చెన్నై ఓటమిపాలైంది. రుతురాజ్‌ గైక్వాడ్‌ (101; 60 బంతుల్లో) సూపర్ సెంచరీతో చెలరేగడం, ఇతరులు కూడా బ్యాట్లకు పనిచెప్పడం వల్ల 189 పరుగుల భారీ స్కోర్‌ సాధించింది. అయితే, రాజస్థాన్‌ ఛేదనలో సునాయాసంగా గెలిచి ధోనీసేనకు షాకిచ్చింది. 17.3 ఓవర్లలోనే లక్ష్యాన్ని పూర్తిచేసింది. శివమ్‌ దూబె(64; 42), యశస్వి జైస్వాల్ (50; 21 బంతుల్లో) దంచికొట్టారు. దీన్ని బట్టి చెన్నై బౌలింగ్‌ ఎలా ఉందనేది అర్థమవుతోంది.