రాణించిన రాజస్థాన్ బౌలర్లు.. దిల్లీ 154/6

రాజస్థాన్ రాయల్స్​తో జరుగుతున్న మ్యాచ్​లో మొదట బ్యాటింగ్ చేసిన దిల్లీ క్యాపిటల్స్ తడబడింది. రాజస్థాన్ రాయల్స్ బౌలర్లు కట్టుదిట్టంగా బౌలింగ్ చేయడం వల్ల నిర్ణీత 20 ఓవర్లలో 6 వికెట్ల నష్టానికి 154 పరుగులు చేసింది. శ్రేయస్ అయ్యర్ 43 పరుగులతో రాణించాడు.

ఐపీఎల్ 2021లో భాగంగా రాజస్థాన్ రాయల్స్​తో జరుగుతున్న మ్యాచ్​లో దిల్లీ క్యాపిటల్స్ బ్యాటింగ్ విభాగం విఫలమైంది. టాస్ ఓడి మొదట బ్యాటింగ్​కు దిగిన దిల్లీ శుభారంభం దక్కలేదు. ఈ సీజన్​లో అద్భుత ప్రదర్శన కనబర్చిన ఓపెనర్లు ధావన్ (8), పృథ్వీషా (10) ఈ మ్యాచ్​లో విఫలమయ్యారు. ఆ తర్వాత కెప్టెన్ పంత్​తో కలిసి మాజీ కెప్టెన్ శ్రేయస్ అయ్యర్​ జట్టును ఆదుకునే ప్రయత్నం చేశారు. రాజస్థాన్ బౌలర్లు కట్టుదిట్టంగా బౌలింగ్ చేయడం వల్ల పరుగులు చేయడంలో కాస్త ఇబ్బందిపడ్డారు. పంత్ తన శైలికి భిన్నంగా నెమ్మదిగా ఆడాడు. ఈ క్రమంలోనే పంత్​ (24)ను ముస్తాఫిజుర్ క్లీన్ బౌల్డ్ చేయగా, అయ్యర్​ (43) స్టంపౌట్​గా వెనుదిరిగాడు.

తర్వాత వచ్చిన హెట్​మెయర్​ కాసేపు రాజస్థాన్​ బౌలర్లను కాచుకుని దిల్లీ ఇన్నింగ్స్​ను గాడినపెట్టే ప్రయత్నం చేశాడు. కానీ 28 పరుగులు చేసి పెవిలియన్ చేరాడు. అనంతరం వచ్చిన బ్యాట్స్​మెన్ రాజస్థాన్ బౌలర్లను ఎదుర్కోవడంలో విఫలమవడం వల్ల నిర్ణీత 20 ఓవర్లలో 154 పరుగులకు పరిమితమైంది దిల్లీ.