ఐపీఎల్ రెండో అంచెలో(IPL 2021) కోల్కతా నైట్‌రైడర్స్‌కు వరుసగా రెండో విజయం. రాహుల్‌ త్రిపాఠి (74 నాటౌట్‌; 42 బంతుల్లో 8×4, 3×6), వెంకటేశ్ అయ్యర్‌ (53; 30 బంతుల్లో 4×4, 3×6) వీర విహారం చేయడంతో గురువారం ఏకపక్షంగా సాగిన మ్యాచ్లో ఆ జట్టు 7 వికెట్ల తేడాతో ముంబయి ఇండియన్స్‌ను(KKR Vs MI 2021) చిత్తు చేసింది. 156 పరుగుల లక్ష్యాన్ని కోల్కతా.. 15.1 ఓవర్లలోనే మూడు వికెట్లు కోల్పోయి ఛేదించింది. మొదట ముంబయి 6 వికెట్లకు 155 పరుగులే చేయగలిగింది. డికాక్‌ (55; 42 బంతుల్లో 4×4, 3×6) టాప్‌ స్కోరర్‌. ఫెర్గూసన్‌ (2/27), నరైన్‌ (1/20), ప్రసిద్ధ్‌ కృష్ణ (2/43), వరుణ్‌ చక్రవర్తి (0/20) ముంబయిని కట్టడి చేశారు.
ఆ ఇద్దరు దంచేశారు..
అసలే సాధారణ లక్ష్యం. ఆపై దాన్ని మరింత తేలిక చేశాడు కొత్త సంచలనం వెంకటేశ్(Venkatesh Iyer IPL 2021) అయ్యర్‌. తన తొలి మ్యాచ్లో ధనాధన్‌ బ్యాటింగ్‌తో అందరినీ ఆకట్టుకున్న ఈ కుర్రాడు.. ఈసారి మరింతగా చెలరేగాడు. ఏడాపెడా బౌండరీలతో కోల్కతా స్కోరు బోర్డును పరుగులు పెట్టించాడు. ఎదుర్కొన్న తొలి బంతి (బౌల్ట్‌)నే డీప్‌ స్క్వేర్‌లో సిక్స్‌గా మలిచి ఉద్దేశాన్ని చాటిన వెంకటేశ్.. ఏ దశలోనూ వెనక్కి తగ్గలేదు. మైదానం అన్నివైపులా కళ్లు చెదిరే షాట్లతో అభిమానులను మంత్రముగ్దుల్ని చేశాడు. మిల్నె వేసిన ఇన్నింగ్స్‌ రెండో ఓవర్లో సిక్స్‌, రెండు ఫోర్లు బాదేశాడు. కోల్కతా.. ఓపెనర్‌ శుభ్‌మన్‌ గిల్‌(13)ను కోల్పోయి 3 ఓవర్లకే 40 పరుగులు చేసింది. నిజానికి తక్కువ లక్ష్యాన్ని కూడా కాచుకోగల బౌలింగ్‌ దళం ముంబయికి ఉంది. అలా చేసిన సందర్భాలెన్నో. కానీ ఈసారి బుమ్రా, బౌల్ట్‌ సహా ఎవరి పప్పులూ ఉడకలేదు.
వెంకటేశ్‌తో పోటీపడుతూ రాహుల్‌ త్రిపాఠి(Rahul Tripathi Vs MI) కూడా రెచ్చిపోవడం వల్ల ముంబయికి ఎలాంటి అవకాశమూ లేకపోయింది. త్రిపాఠి భారీ షాట్లతో ముంబయి బౌలింగ్‌ను తుత్తునియలు చేశాడు. బ్యాట్స్మెన్ ఇద్దరూ బౌండరీల మోత మోగించడం వల్ల కోల్కతా చాలా వేగంగా లక్ష్యం దిశగా సాగింది. 10 ఓవర్లు ముగిసే సరికే స్కోరు 111/1. ఆ తర్వాత వెంకటేశ్ (25 బంతుల్లో), త్రిపాఠి (29 బంతుల్లో) అర్ధశతకాలు పూర్తి చేశారు. బుమ్రా వేసిన 12వ ఓవర్లో తిప్రాఠి ఓ సిక్స్‌, ఫోర్‌ బాదేశాడు. అదే ఓవర్లో వెంకటేశ్ బౌల్డయినా కోల్‌కతాకు ఆందోళన చెందాల్సిన అవసరమేమీ లేకపోయింది. ఎందుకంటే అప్పటికి స్కోరు 128. త్రిపాఠి జోరుతో మిగతా పని పూర్తి చేయడానికి కోల్‌కతాకు ఎంతో సమయం పట్టలేదు.