ఒకవైపు డేవిడ్‌ వార్నర్ మెరుపులు.. మరోవైపు విరాట్‌ కోహ్లీ దూకుడు.. ఇంకోవైపు భువీ, ఫిజ్‌ చురకత్తుల్లాంటి బంతులు.. ఆరంభంలో క్రిస్‌గేల్‌.. ఆఖర్లో బెన్‌ కటింగ్‌ విధ్వంసం.. మొత్తంగా నువ్వా నేనా అన్నట్టు సాగిన పోరు.. క్షణ క్షణం ఉత్కంఠభరింతంగా మారిన పోటీ.. ఆఖరికి 8 పరుగుల తేడాతో విజయం..! గుర్తొచ్చాయా సన్రైజర్స్ హైదరాబాద్ తొలిసారి ఐపీఎల్ ట్రోఫీని ముద్దాడిన క్షణాలు.. మరచిపోలేని ఆ అనుభూతులు. 2016లో సరిగ్గా వార్నర్ సేన సంచలనం సృష్టించి నేటికి (మే 29) ఐదేళ్లు. ఓ సారి ఆ మ్యాచ్పై లుక్కేద్దాం..
ఆరంభంలో వార్నర్.. ఆఖర్లో కటింగ్‌
2016లో ఆర్‌సీబీ భీకరమైన ఫామ్‌లో ఉంది. ఎలాంటి స్కోర్లనైనా ఛేదిస్తోంది. విరాట్‌ కోహ్లీ కెరీర్లోనే వీరోచితమైన ఫామ్‌లో ఉన్నాడు. నాలుగు శతకాలు బాదేశాడు. అలాంటిది చిన్నస్వామి మైదానంలో టాస్‌ గెలవగానే సన్రైజర్స్ బ్యాటింగ్‌ ఎంచుకుంది. డేవిడ్‌ వార్నర్ (69; 38 బంతుల్లో 8×4, 3×6), శిఖర్‌ ధావన్‌ (28; 25 బంతుల్లో 3×4, 1×6) శుభారంభమే అందించారు. దాంతో 6 ఓవర్లకు జట్టు 59 పరుగులు చేసింది. గబ్బర్‌, హెన్రిక్స్‌ (4) త్వరగా ఔట్ అయినప్పటికీ యువీ (38; 23 బంతుల్లో 4×4, 2×6) సహకారంతో వార్నర్ దూకుడు కొనసాగించాడు. వీరిద్దరూ 11 ఓవర్లకే స్కోరును 100 దాటించారు. జట్టు స్కోరు 125 వద్ద డేవీ వెనుదిరిగాడు. 16.2 ఓవర్లకే స్కోరు 150 దాటినా యువీ, దీపక్ హుడా (3), నమన్‌ ఓజా (7), బిపుల్‌ శర్మ (5) స్వల్ప వ్యవధిలోనే పెవిలియన్‌ చేరడం వల్ల ఉత్కంఠ కలిగింది. కానీ బెన్‌కటింగ్‌ (39*; 15 బంతుల్లో 3×4, 4×6) 20వ ఓవర్లో 4, 6, 6, 1, 6 బాదేసి స్కోరును 208కు చేర్చాడు.