ప్రత్యేక విమానాల ద్వారా ఆస్ట్రేలియా క్రికెటర్లను పంపించేందుకు బీసీసీఐ సన్నాహాలు చేస్తుంది. ఈ విషయాన్ని ఆ దేశ బోర్డు తాత్కాలిక సీఈఓ నిక్ హాక్లే చెప్పారు. కరోనా ప్రభావంతో ఐపీఎల్ నిరవధిక వాయిదా పడింది. దీంతో లీగ్లో పాల్గొన్న విదేశీ ఆటగాళ్లు తమ స్వదేశాలకు చేరుకుంటున్నారు. ఆస్ట్రేలియా ప్రభుత్వం.. భారత్ నుంచి వచ్చే విమానాలను నిలిపివేసిన నేపథ్యంలో ఆ దేశ ఆటగాళ్లు.. స్వదేశానికి ఎలా వెళ్లాలో తెలియక సందిగ్ధంలో పడ్డారు. దీంతో వారిని సురక్షితంగా తమ దేశానికి పంపించే ప్రయత్నాలు చేస్తోంది బీసీసీఐ.
"బీసీసీఐ మా ఆటగాళ్లను పంపించేందుకు ఉన్న సాధ్యాసాధ్యాలను పరిశీలిస్తోంది. మాల్దీవులు లేదా శ్రీలంక మీదుగా చార్టెడ్ ఫ్లైట్స్ ద్వారా పంపించే ప్రయత్నం చేస్తోంది."
-నిక్ హాక్లే, ఆస్ట్రేలియా క్రికెట్ బోర్డు తాత్కాలిక సీఈఓ.
పదిరోజులు క్వారంటైన్లో
ఐపీఎల్లో పాల్గొన్న 11 మంది ఇంగ్లాండ్ ఆటగాళ్లలో ఎనిమిది మంది తమ స్వదేశానికి బుధవారమే చేరుకున్నారు. వీరిలో బట్లర్, బెయిర్ స్టో ఉన్నారు. సారథి మోర్గాన్, డేవిడ్ మలన్, క్రిస్ జోర్డాన్ మరో 48 గంటల్లో బయలుదేరనున్నారు. అయితే భారత్ నుంచి వచ్చేవారికి అక్కడి ప్రభుత్వం కొన్ని నిబంధనలను విధించింది. అక్కడికి చేరుకోగానే ప్రభుత్వం ఏర్పాటు చేసిన క్వారంటైన్లో పదిరోజులు ఉండాల్సి ఉంటుంది.
మే10 వరకు ఇక్కడే
న్యూజిలాండ్ క్రికెటర్లు కూడా మే 10వరకు భారత్లోనే ఉండాల్సిన పరిస్థితి ఏర్పడింది. సాధారణంగా కివీస్ క్రికెటర్లు ఐపీఎల్ పూర్తికాగానే ఇంగ్లాండ్తో ఆడేందుకు నేరుగా అక్కడికి వెళ్లాలి. కానీ ప్రస్తుత పరిస్థితుల్లో యూకే ప్రభుత్వం మే 10వరకు తమ దేశానికి వచ్చే విమాన ప్రయాణాలపై ఆంక్షలు విధించింది. బయట నుంచి వచ్చే తమ దేశ ప్రజలకు(నిబంధనలతో కూడిన) తప్ప ఇతరులకు అనుమతి ఇవ్వలేదు. ఈ కారణంగానే న్యూజిలాండ్ క్రికెటర్లు సారథి కేన్ విలియమ్సన్, బౌల్ట్, జెమీసన్‌, షేన్ బాండ్, మైక్ హెసన్, టిమ్ సీఫర్ట్, ఆడమ్ మిల్నే, స్కాట్, జేమ్స్ పామెంట్ ఇక్కడే ఉండాల్సిన పరిస్థితి వచ్చింది. కాబట్టి మే 11న ఇక్కడి నుంచి వారు ఇంగ్లాండ్కు బయలుదేరుతారు.
ఇదీ చూడండి: 'టీ20 ప్రపంచకప్పై తుదినిర్ణయం అప్పుడే'
