ఐపీఎల్లో ఆడేందుకు తమ దేశ ఆటగాళ్లను అనుమతించనున్నట్లు బంగ్లాదేశ్ క్రికెట్ బోర్డు (బీసీబీ) అధికారి ఓ ఇంటర్వ్యూలో స్పష్టం చేశాడు. వచ్చే నెలలో శ్రీలంకతో సుదీర్ఘ పర్యటన ఉన్న నేపథ్యంలో ఐపీఎల్కు తమ క్రికెటర్లను పంపించేందుకు బంగ్లా సిద్ధపడింది.
"ఐపీఎల్లో పేసర్ ముస్తఫిజుర్ రెహమాన్ పాల్గొనాలనుకుంటే అతడికి ఎన్ఓసీ ఇచ్చి అనుమతిస్తాం. ఆల్రౌండర్ షకిబుల్ హసన్కు ఇప్పటికే నిరభ్యంతర పత్రాన్ని (ఎన్ఓసీ) అందించాం. ఎన్ఓసీ అడిగిన ప్రతి క్రికెటర్ను అనుమతించేందుకు బోర్డు సిద్ధంగా ఉంది. ఎందుకంటే జాతీయ జట్టుకు ఆడాలని ఆసక్తి లేనప్పుడు వాళ్లను ఒత్తిడి చేయడం సరికాదు".
- అక్రమ్ ఖాన్, బీసీబీ క్రికెట్ ఆపరేషన్స్ ఛైర్మన్
"షకిబుల్ హసన్.. ప్రస్తుతం పొట్టి ఫార్మాట్పై దృష్టి సారించాడు. టెస్టుల్లో ఆడాలని తాను అనుకోవడం లేదు. అతడు ఐపీఎల్లో ఆడేందుకు బోర్డును అనుమతి కోరాడు. టెస్టుల్లో ఆడేందుకు ఆసక్తి లేని కారణంగా అతడికి ఎన్ఓసీ ఇచ్చేందుకు బోర్డు అంగీకరించింది" అని ఓ బంగ్లాదేశ్ వార్తాసంస్థకు ఇచ్చిన ఇంటర్వ్యూలో బీసీబీ అధికారి అక్రమ్ ఖాన్ వెల్లడించాడు.
అయితే, ముస్తఫిజుర్ రెహమాన్కు ఎన్ఓసీ ఇచ్చేందుకు బంగ్లా బోర్డు తొలుత తిరస్కరించింది. ప్రస్తుత ఐపీఎల్లో రెహమాన్తో పాటు ఆల్రౌండర్ షకిబుల్ హసన్ (ఇద్దరు బంగ్లా ఆటగాళ్లు) మాత్రమే పాల్గొంటారు.
ముస్తఫిజుర్ రెహమాన్ను కోటి రూపాయలకు రాజస్థాన్ రాయల్స్ వేలంలో సొంతం చేసుకోగా.. ఆల్రౌండర్ షకిబుల్ హసన్ను రూ.3.2 కోట్లకు కోల్కతా నైట్రైడర్స్ జట్టు దక్కించుకుంది.
ఇదీ చూడండి:ముంబయి ఇండియన్స్‌ పట్టిన మరో బంగారం?
