IPL 2022 Teams: మరికొద్ది రోజుల్లో ఐపీఎల్ సందడి ప్రారంభం కానుంది. ఈసారి కొత్తగా మరో రెండు జట్ల ఎంట్రీతో వినోదం రెండింతలు అవుతుంది. మ్యాచ్ వేదికలకు సంబంధించి ఇప్పటికే ప్రకటన విడుదల చేసిన నిర్వహకులు.. ఇప్పుడు జట్లను గ్రూప్స్గా విడదీసి, అందుకు సంబంధించిన వివరాలను వెల్లడించారు. రెండు గ్రూప్లను ఏర్పాటు చేసి, పది జట్లలో ఐదు జట్లకు గ్రూప్ ఏ, మిగతా వాటికి గ్రూప్ బీలో చేర్చారు.
ముంబయి ఇండియన్స్, దిల్లీ క్యాపిటల్స్, కోల్కతా నైట్రైడర్స్, రాజస్థాన్ రాయల్స్ సహా కొత్త జట్టు లక్నో సూపర్ జెయింట్స్ గ్రూప్లో ఏలో ఉన్నాయి.
చెన్నై సూపర్ కింగ్స్, సన్రైజర్స్ హైదరాబాద్, రాయల్ ఛాలెంజర్స్ బెంగళూరు, పంజాబ్ కింగ్స్ సహా మరో కొత్త జట్టు గుజరాత్ టైటాన్స్ గ్రూప్ బీలో ఉన్నాయి.
ఆ జట్ల మధ్య రెండు మ్యాచ్లు..
ఓ గ్రూప్లో ఉన్న జట్టు లీగ్ దశలో అదే గ్రూప్లో ఉన్న జట్లతో రెండేసి మ్యాచ్లు ఆడుతుంది. ఉదాహరణకు.. గ్రూప్ ఏలో ఉన్న ముంబయి ఇండియన్స్ అదే గ్రూప్లోని కోల్కతా, రాజస్థాన్, దిల్లీ, లక్నో జట్లతో తలో రెండు మ్యాచ్ల్లో తలపడుతుంది. గ్రూప్ బీలోని చెన్నైతో రెండు మ్యాచ్లు ఆడనుంది. అదే గ్రూప్లోని మిగిలిన జట్లతో చెరో ఒక మ్యాచ్ ఆడుతుంది.
గ్రూప్ బీలో ఉన్న ఆర్సీబీ కూడా గ్రూప్ ఏలో రాజస్థాన్ రాయల్స్తో రెండు మ్యాచ్లు ఆడుతుంది. ఆ గ్రూప్లో ఉన్న ఇతర టీమ్స్తో ఒక్కో మ్యాచ్ ఆడుతుంది. మరోవైపు సొంత గ్రూప్లోని జట్లతో రెండు మ్యాచ్లతో తలపడుతుంది.
ఈ ఏడాది మార్చి 26న ప్రారంభం కానున్న ఈ లీగ్ మే 29తో ముగుస్తుంది. ఈసారి ఐపీఎల్ మ్యాచులన్నీ మహారాష్ట్రలోనే జరుగుతాయి. ముంబయిలో 55, పుణెలో 15 మ్యాచ్ల్ని నిర్వహిస్తారు. వీటిలో వాంఖడే 20, బ్రబోర్న్ 20, డీవై పాటిల్ స్టేడియం 15, ఎమ్సీఏ గ్రౌండ్ 15 మ్యాచ్లకు ఆతిథ్యం ఇవ్వనుంది.
ఇదీ చూడండి :అతడు ఒక్క ఇన్నింగ్స్ ఆడితే చాలు.. లెక్క సరిపోతుంది: రోహిత్
