IPL 2022 KL Rahul: ఐపీఎల్లో కొత్తగా చేరిన లఖ్నవూ సూపర్ జెయింట్స్ జట్టుకు కెప్టెన్‌గా నియమితుడైన కేఎల్ రాహుల్.. తన పాత జట్టు పంజాబ్ కింగ్స్ను ఎందుకు వీడాల్సి వచ్చిందో కారణం చెప్పాడు. మెగా టోర్నీకి ముందు ఓ క్రీడా ఛానెల్‌తో మాట్లాడిన అతడు అందుకు కారణాన్ని వివరించాడు.
'నేను పంజాబ్ జట్టులో నాలుగేళ్లు ఆడా. అక్కడ భారీగా పరుగులు చేశా. అయితే, ఈ సీజన్‌కు ముందు నా కెరీర్‌లో వేరే కొత్త అవకాశాలేమైనా ఉన్నాయా అని తెలుసుకోవాలని చూశా. పంజాబ్‌ను వీడడం కష్టతరమైన నిర్ణయమే. ఆ జట్టుతో చాలా కాలం ఆడిన నేపథ్యంలో ఈసారి కొత్తగా ఏమైనా చేయగలనా అని ఆలోచించా' అని రాహుల్ చెప్పుకొచ్చాడు. కాగా, పంజాబ్‌ను వీడడం రాహుల్ సొంత నిర్ణయమని ఆ జట్టు కోచ్‌ అనిల్‌కుంబ్లే ఇంతకుముందే వెల్లడించాడు.