IPL 2022 CSK: రెండేళ్లపాటు నిషేధం.. నాలుగుసార్లు ఛాంపియన్‌.. ఐపీఎల్ చరిత్రలోనే అత్యధికసార్లు ఫైనల్కు దూసుకెళ్లిన జట్టు చెన్నై సూపర్ కింగ్స్.. కెప్టెన్‌ ఎంఎస్ ధోనీతోపాటు ఇద్దరు ఆల్‌రౌండర్లు, ఒక స్పెషలిస్ట్‌ బ్యాటర్‌ను రిటెయిన్‌ చేసుకుంది. మరి మెగా వేలంలో ఎలాంటి ఆటగాళ్లను కొనుగోలు చేసుకుంది.. ఈసారి కెప్టెన్‌ కూల్‌ జట్టు కూర్పును ఎలా చేయబోతున్నాడు, సారథిగా ధోనీకి ఇదే చివరి ఐపీఎల్‌గా విశ్లేషకులు భావిస్తోన్న తరుణంలో జట్టు బలాలు, బలహీనతలను ఓసారి అంచనా వేద్దాం..
CSK Captain Dhoni: ఎంఎస్ ధోనీ నాయకత్వంలో టీమ్‌ఇండియా అపూర్వమైన విజయాలను సాధించింది. అలానే తొలి ఎడిషన్‌ నుంచి సీఎస్‌కేను నడిపిస్తోన్న ఏకైక సారథి ఎంఎస్ ధోనీ.. బ్యాటర్‌గా ఫామ్‌లో లేకపోయినా కెప్టెన్సీ మాత్రం అదరగొట్టేస్తున్నాడు. నాలుగుసార్లు సీఎస్‌కేను ఛాంపియన్‌గా నిలిపాడు. ఈసారి మెగా వేలానికి ముందు ధోనీతోపాటు భారత ఆల్‌రౌండర్‌ రవీంద్ర జడేజా, ఇంగ్లాండ్‌కు చెందిన మొయిన్‌ అలీ, గతేడాది ఆరెంజ్‌ క్యాప్‌ విజేత రుతురాజ్ గైక్వాడ్‌ను సీఎస్కే రిటెయిన్‌ చేసుకుంది. వేలంలో రాబిన్ ఉతప్ప, అంబటి రాయుడు, డ్వేన్ బ్రావో, దీపక్ చాహర్, హరి నిషాంత్‌, జగదీశన్‌, కేఎం అసిఫ్, తుషార్‌ దేశ్‌పాండే, శివమ్ దూబె, క్రిస్‌ జొర్డాన్‌, మహీశ్ తీక్షణ, ప్రిటోరియస్, డేవన్ కాన్వే, మిచెల్ సాంట్నర్, ఆడమ్ మిల్నే, సేనాపతి, ముకేశ్‌ చౌదరి, ప్రశాంత్ సోలంకీ, భగత్‌వర్మను సొంతం చేసుకుంది.
ప్రధాన బ్యాటర్లు వీరే.. ఆల్‌రౌండర్లే అధికం
CSK Team Players: గతేడాది డుప్లెసిస్‌-రుతురాజ్ జోడీ చెలరేగి ఆడటంతో కప్‌ సొంతం చేసుకుంది. ఇప్పుడు రుతురాజ్‌కు తోడుగా ఉతప్పను పంపొచ్చు. గత సీజన్‌ ఆఖర్లో ఉతప్ప ఫర్వాలేదనిపించాడు. ఆరంభ ఓవర్లలో స్ట్రోక్‌ప్లేతో బౌండరీలను అలవోకగా బాదుతాడు. ఇక మిడిలార్డర్‌లో అంబటి రాయుడు, శివమ్ దూబె, ప్రిటోరియస్, ఎంఎస్ ధోనీ, డ్వేన్ బ్రావో, క్రిస్‌ జొర్డాన్‌, దీపక్ చాహర్, మిచెల్ సాంట్నర్... లోయర్‌ ఆర్డర్‌ వరకు ఆదుకోగల ఆటగాళ్లు ఉన్నారు. అయితే ఓపెనింగ్‌ భాగస్వామ్యం పటిష్ఠంగా ఉంటేనే తర్వాత వచ్చే బ్యాటర్లు అలవోకగా పరుగులు రాబట్టగలరు. లేకపోతే ఒత్తిడికి చిత్తయ్యే అవకాశం ఉంది. మొత్తం 25 మంది సభ్యుల్లో 9 మంది ఆల్‌రౌండర్లు ఉండటం విశేషం.